வெனிசுலா அதிபர் நிகோலஸ் மதுரோ அமெரிக்காவால் கைது செய்யப்பட்டதன் தாக்கம், உலக நிதி சந்தைகளில் மிதமான எதிரொலியை ஏற்படுத்தியுள்ளது. இதன் விளைவாக, கச்சா எண்ணெய் விலை சரிவடைந்துள்ளது.
வர்த்தகம் தொடங்கிய சிறிது நேரத்தில் அமெரிக்க கச்சா எண்ணெய் ஒரு பேரல் 56.96 டாலராக குறைந்தது. சர்வதேச சந்தையில் பிரென்ட் ரக கச்சா எண்ணெய் விலை 34 சென்ட் குறைந்து 60.41 டாலராக நிலவியது.
1990களில் தினசரி சுமார் 35 லட்சம் பேரல்கள் உற்பத்தி செய்த வெனிசுலா, அமெரிக்க மற்றும் ஐரோப்பிய தடைகளால் தற்போது 11 லட்சம் பேரல்கள் மட்டுமே உற்பத்தி செய்கிறது. மதுரோ கைது செய்யப்பட்டதை தொடர்ந்து, வெனிசுலா எண்ணெய் உற்பத்தியில் அமெரிக்கா தலையிடும் என முன்னாள் அதிபர் டிரம்ப் அறிவித்துள்ளதால், உற்பத்தி அதிகரிக்க வாய்ப்பு உள்ளதாக சந்தை வல்லுநர்கள் கருதுகின்றனர்.
இதன் காரணமாக, கடந்த ஆறு மாதங்களாக நிலைத்திருந்த கச்சா எண்ணெய் சந்தையில், தற்போது விலை சரிவு ஏற்பட்டுள்ளது.
இதற்கிடையில், உலக அரசியல் மற்றும் பொருளாதார அசாதாரண சூழ்நிலைகள் காரணமாக முதலீட்டாளர்கள் பாதுகாப்பான முதலீடுகளுக்கு மாறியுள்ளனர். இதனால், அமெரிக்க சந்தையில் தங்கம் விலை 2.70 சதவீதமும், வெள்ளி விலை 6.60 சதவீதமும் உயர்ந்துள்ளது.
உக்ரைன் போர், மத்திய கிழக்கு பதற்றம், அமெரிக்க-சீன வர்த்தக மோதல் மற்றும் பல்வேறு நாடுகளின் நிதிக்கொள்கைகள் ஆகியவற்றை பங்குச்சந்தை வல்லுநர்கள் தீவிரமாக கவனித்து வருகின்றனர். அமெரிக்க மத்திய வங்கி வெளியிட உள்ள பொருளாதார அறிக்கைகளும் சந்தை எதிர்பார்ப்பை அதிகரித்துள்ளன.