புதுடில்லி: இயற்கை மற்றும் மனிதனால் ஏற்படும் பேரிடர்களின் போது உயிர்களை பாதுகாக்கவும், நிவாரணப் பணிகளை சிறப்பாக மேற்கொள்ளவும் தேசிய பேரிடர் மீட்புப் படை (NDRF) தொடர்ந்து அர்ப்பணிப்புடன் செயல்பட்டு வருகிறது என பிரதமர் நரேந்திர மோடி பாராட்டியுள்ளார்.
தேசிய பேரிடர் மீட்புப் படையின் நிறுவன தினத்தை முன்னிட்டு சமூக வலைதளத்தில் பதிவிட்டுள்ள பிரதமர் மோடி, நெருக்கடியான சூழ்நிலைகளில் தங்கள் தொழில்முறை திறன், உறுதி மற்றும் கடமையுணர்வின் மூலம் மக்கள் நம்பிக்கையை மீட்டெடுக்கும் NDRF வீரர்கள் மற்றும் வீராங்கனைகளுக்கு தனது ஆழ்ந்த பாராட்டுகளை தெரிவித்துள்ளார்.
மிகவும் சவாலான சூழ்நிலைகளிலும் உயிர்களை காக்கும் பணியில் முன்னணியில் நிற்கும் தேசிய பேரிடர் மீட்புப் படை, பேரிடர் தயார்நிலை மற்றும் மீட்புப் பணிகளில் சர்வதேச அளவில் மதிப்பையும் மரியாதையையும் பெற்றுள்ளதாக பிரதமர் மோடி குறிப்பிட்டுள்ளார்.