புதுச்சேரி,
தமிழகத்துடன் சேர்ந்து யூனியன் பிரதேசமான புதுச்சேரியில் வரும் ஏப்ரல் 6-ஆம் தேதி அன்று சட்டப்பேரவைத் தேர்தல் நடைபெற உள்ளது. புதுச்சேரியில் 15 தொகுதிகளில் காங்கிரஸ் போட்டியிடும் நிலையில் ஏனாம் தொகுதிக்கு வேட்பாளர் அறிவிக்கப்படவில்லை.
புதுச்சேரியில் காங்கிரஸ் கட்சி போட்டியிடும் 14 தொகுதிகளுக்கு வேட்பாளர்கள் அறிவிக்கப்பட்டுள்ள நிலையில் முன்னாள் முதல்-மந்திரி நாராயணசாமி பெயர் இடம்பெறவில்லை.
புதுச்சேரியில் மொத்தம் 30 சட்டப்பேரவைத் தொகுதிகள் உள்ளன. அதில் காங்கிரஸ் 15, திமுக 13, இந்திய கம்யூனிஸ்ட் 1 மற்றும் விடுதலை சிறுத்தைகள் கட்சி 1 என காங்கிரஸ் கூட்டணி அமைத்து இந்த தேர்தலில் போட்டியிடுகிறது.
கடந்த 2016 தேர்தலில் போட்டியிடாத நாராயணசாமியை புதுச்சேரி முதல்-மந்திரியாக அறிவித்தது அகில இந்திய காங்கிரஸ் தலைமை. தொடர்ந்து அதன் பின்னர் நடைபெற்ற இடைத்தேர்தலில் நாராயணசாமி நெல்லித்தோப்பு தொகுதியில் போட்டியிட்டு வெற்றி பெற்றார் என்பது குறிப்பிடத்தக்கது.
இந்நிலையில், புதுச்சேரி சட்டமன்ற தேர்தலில் முன்னாள் முதல்-மந்திரி நாராயணசாமி போட்டியிட மாட்டார் என காங்கிரஸ் மேலிட பொறுப்பாளர் தினேஷ் குண்டுராவ் தெரிவித்துள்ளார்.