காமன்வெல்த் வாள் சண்டையில் இந்தியா வரலாறு; ஒட்டுமொத்த சாம்பியன் பட்டம் வென்று சாதனை

நைஜீரியாவில் நடைபெற்ற காமன்வெல்த் வாள் சண்டை சாம்பியன்ஷிப்பில் இந்திய அணி அபாரமான ஆட்டத்தை வெளிப்படுத்தி, முதல் முறையாக ஒட்டுமொத்த சாம்பியன் பட்டத்தை வென்று சாதனை படைத்துள்ளது. 23 வயதுக்குட்பட்டோர் மற்றும் சீனியர் பிரிவுகளுக்கான போட்டிகள் நடைபெற்றன. கடைசி நாளில் நடைபெற்ற சீனியர் பிரிவு போட்டிகளில் இந்திய வீரர்கள் ஆதிக்கம் செலுத்தினர். பெண்கள் சாப்ரே அணிப் பிரிவில் இந்தியா தங்கப் பதக்கத்தை வென்றது. தனிநபர் பிரிவில் வெண்கலம் வென்ற ஷ்ருதி, அணிப் பிரிவில் தங்கம் வென்று அசத்தினார். போட்டியின் இறுதி நாளில் மட்டும் இந்தியா ஐந்து தங்கம் மற்றும் ஒரு வெள்ளிப் பதக்கத்தை கைப்பற்றியது. ஒட்டுமொத்தமாக 13 தங்கம், 8 வெள்ளி மற்றும் 14 வெண்கலப் பதக்கங்களுடன் 35 பதக்கங்களை வென்று இந்தியா முதலிடத்தைப் பிடித்தது. இந்த வெற்றி இந்திய வாள் சண்டை வீரர்களின் திறமை மற்றும் கடின உழைப்புக்கு கிடைத்த அங்கீகாரம் என இந்திய வாள் சண்டை சங்க பொதுச் செயலர் ராஜீவ் மேத்தா தெரிவித்துள்ளார்.