தென் கொரியாவை 5-1 என வீழ்த்தியது இந்தியா; ஜூனியர் ஹாக்கி பைனலில் சீனாவுடன் மோதல்

மொகி: ஜூனியர் ஆசிய கோப்பை ஹாக்கி தொடரின் அரையிறுதியில் தென் கொரியாவை 5-1 என்ற கோல் கணக்கில் வீழ்த்திய இந்திய பெண்கள் அணி இறுதிப்போட்டிக்கு முன்னேறியுள்ளது. இன்று நடைபெறும் பைனலில் சீனாவை எதிர்கொள்கிறது. சீனாவில் 20 வயதுக்கு உட்பட்டோருக்கான ஜூனியர் ஆசிய கோப்பை ஹாக்கி தொடரின் 10வது சீசன் நடைபெற்று வருகிறது. நேற்று பெண்கள் பிரிவில் அரையிறுதிப் போட்டிகள் நடைபெற்றன. முதல் அரையிறுதியில் இந்திய அணி தென் கொரியாவை எதிர்கொண்டது. ஆட்டத்தின் தொடக்கம் முதலே இந்திய வீராங்கனைகள் சிறப்பான ஆட்டத்தை வெளிப்படுத்தினர். 13வது நிமிடத்தில் மாது சிதார் கோல் அடித்து இந்தியாவுக்கு முன்னிலை பெற்றுத் தந்தார். தொடர்ந்து 21வது நிமிடத்தில் சுக்வீர் கவுர் ஒரு கோல் அடித்தார். இந்திய அணியின் சுப்ரியா அபாரமாக விளையாடி 17வது, 33வது மற்றும் 56வது நிமிடங்களில் கோல் அடித்து ஹாட்ரிக் சாதனை படைத்தார். தென் கொரியா அணியின் சார்பில் 41வது நிமிடத்தில் ஜியாங் ஒரு கோல் அடித்தார். இருப்பினும், இந்தியாவின் தாக்குதல் ஆட்டத்தை சமாளிக்க முடியாமல் போனதால், ஆட்டத்தின் முடிவில் இந்திய அணி 5-1 என்ற கோல் கணக்கில் வெற்றி பெற்றது. இதன் மூலம் இந்திய பெண்கள் அணி ஜூனியர் ஆசிய கோப்பை ஹாக்கி இறுதிப்போட்டிக்கு தகுதி பெற்றுள்ளது. மற்றொரு அரையிறுதியில் சீனா 6-0 என்ற கோல் கணக்கில் ஜப்பானை வீழ்த்தி இறுதிப்போட்டிக்கு முன்னேறியது. இன்று நடைபெறும் இறுதிப்போட்டியில் இந்தியா மற்றும் சீனா அணிகள் பலப்பரீட்சை நடத்துகின்றன. இந்தப் போட்டியில் வெற்றி பெற்றால் இந்திய பெண்கள் அணி தொடர்ந்து 3வது முறையாக கோப்பையை கைப்பற்றும் வாய்ப்பு உள்ளது. ஆண்கள் அணிக்கும் இன்று பைனல் ஆண்களுக்கான 20 வயதுக்கு உட்பட்ட ஜூனியர் ஆசிய கோப்பை ஹாக்கி இறுதிப்போட்டியும் இன்று நடைபெறுகிறது. இதில் நடப்பு சாம்பியனான இந்திய அணி தென் கொரியாவை எதிர்கொள்கிறது. இந்தப் போட்டியில் இந்திய அணி சிறப்பாக செயல்பட்டு வெற்றி பெற்றால், ஜூனியர் ஆசிய கோப்பையில் தனது 6வது பட்டத்தை கைப்பற்றும் வாய்ப்பு உள்ளது.