பாகிஸ்தானை வீழ்த்தி இலங்கை அபாரம்; ஆசிய கோப்பை இறுதியில் இந்தியாவுடன் மோதல்

துபாய்: பெண்கள் ஆசிய கோப்பை டி20 கிரிக்கெட் தொடரின் இறுதிப்போட்டிக்கு இலங்கை அணி முன்னேறியுள்ளது. இரண்டாவது அரையிறுதியில் பாகிஸ்தான் அணியை 4 விக்கெட் வித்தியாசத்தில் வீழ்த்தி இலங்கை இறுதிச்சுற்றுக்குள் நுழைந்தது. ஐக்கிய அரபு எமிரேட்ஸில் பெண்களுக்கான ஆசிய கோப்பை கிரிக்கெட் தொடரின் 10வது சீசன் நடைபெற்று வருகிறது. முதல் அரையிறுதியில் வங்கதேசத்தை வீழ்த்திய இந்திய அணி ஏற்கனவே இறுதிப்போட்டிக்கு தகுதி பெற்றிருந்தது. இந்நிலையில், நேற்று நடைபெற்ற இரண்டாவது அரையிறுதியில் இலங்கை மற்றும் பாகிஸ்தான் அணிகள் மோதின. 'டாஸ்' வென்ற இலங்கை அணி முதலில் பந்துவீச்சை தேர்வு செய்தது. முதலில் பேட்டிங் செய்த பாகிஸ்தான் அணிக்கு தொடக்கம் சிறப்பாக அமையவில்லை. முனீபா அலி 2 ரன்களிலும், ஷாவல் 24 ரன்களிலும் ஆட்டமிழந்தனர். பெரோஷா 21 ரன்கள் சேர்த்தார். கேப்டன் பாத்திமா சனா சிறப்பாக விளையாடி 47 ரன்களுடன் ஆட்டமிழக்காமல் இருந்தார். இதனால் பாகிஸ்தான் அணி 20 ஓவர்கள் முடிவில் 5 விக்கெட் இழப்புக்கு 130 ரன்கள் எடுத்தது. 131 ரன்கள் என்ற இலக்கை துரத்திய இலங்கை அணிக்கும் ஆரம்பத்தில் தடுமாற்றம் ஏற்பட்டது. கேப்டன் சமாரி அத்தபத்து 5 ரன்களிலும், சஞ்சனா ரன் ஏதும் எடுக்காமலும், ஹாசினி 3 ரன்களிலும் ஆட்டமிழந்தனர். எனினும் ஹர்ஷித்தா 36 ரன்கள் சேர்த்து அணிக்கு நம்பிக்கை அளித்தார். கவிஷா 33 ரன்கள் எடுத்தார். பின்னர் நிலாக்சிகா 13 ரன்களும், கவுஷிஜனி 14 ரன்களும் சேர்த்து இலங்கையின் வெற்றியை உறுதி செய்தனர். இலங்கை அணி 18.5 ஓவர்களில் 6 விக்கெட்டுகளை இழந்து 132 ரன்கள் எடுத்து, 4 விக்கெட் வித்தியாசத்தில் வெற்றி பெற்றது. இதன் மூலம் ஆசிய கோப்பை இறுதிப்போட்டியில் இந்தியா - இலங்கை அணிகள் பலப்பரீட்சை நடத்த உள்ளன.