பில்லி ஜீன் கிங் கோப்பை: நியூசிலாந்தை 3-0 என சாய்த்த இந்திய பெண்கள் அணி

புதுடில்லியில் நடைபெற்று வரும் பில்லி ஜீன் கிங் கோப்பை டென்னிஸ் தொடரின் ஆசிய-ஓசியானியா குழு-1 பிரிவு போட்டிகளில் இந்திய பெண்கள் அணி சிறப்பான ஆட்டத்தை வெளிப்படுத்தி நியூசிலாந்தை 3-0 என்ற கணக்கில் வீழ்த்தியது. இந்த தொடரில் இந்தியா, நியூசிலாந்து, இந்தோனேஷியா, தென் கொரியா, மங்கோலியா மற்றும் தாய்லாந்து உள்ளிட்ட 6 அணிகள் பங்கேற்றுள்ளன. முதல் போட்டியில் தாய்லாந்திடம் 1-2 என்ற கணக்கில் தோல்வியடைந்த இந்திய அணி, இரண்டாவது போட்டியில் தன்னம்பிக்கையுடன் மீண்டு வந்தது. ஒற்றையர் பிரிவில் நடைபெற்ற முதல் ஆட்டத்தில் இந்தியாவின் வைஷ்ணவி அத்கர், நியூசிலாந்தின் ஐஷி தாஸை 6-2, 6-4 என்ற நேர் செட் கணக்கில் வீழ்த்தினார். தொடர்ந்து நடந்த இரண்டாவது ஒற்றையர் போட்டியில் சஹாஜா 6-1, 6-3 என்ற கணக்கில் வாலென்டினா இவானோவை எளிதில் சமாளித்தார். இரட்டையர் பிரிவில் அன்கிதா ரெய்னா மற்றும் ருதுஜா ஜோடி 6-4, 6-2 என்ற கணக்கில் நியூசிலாந்தின் எரின் மற்றும் மோனிக் பாரி ஜோடியை தோற்கடித்து இந்தியாவின் வெற்றியை உறுதி செய்தது. இதன் மூலம் இந்திய அணி இந்த தொடரில் தனது முதல் வெற்றியை பதிவு செய்துள்ளது.