காவிரி நீர் திறப்பில் கர்நாடகா மறுப்பு: தமிழகம் உச்சநீதிமன்றம் செல்ல முடிவு

காவிரி மேலாண்மை ஆணையத்தின் 53வது கூட்டத்தில், தமிழகத்திற்கு உரிய அளவு காவிரி நீரை திறந்துவிட வேண்டும் என்று தமிழக அரசு வலியுறுத்தியது. ஆனால், பெங்களூரு நகரின் குடிநீர் தேவையை முன்னிட்டு தற்போது நீர் திறக்க முடியாது என கர்நாடக அரசு தெரிவித்தது. தமிழக அதிகாரிகள், உச்சநீதிமன்ற தீர்ப்பின்படி ஜூன் முதல் ஜூலை வரை வழங்க வேண்டிய நீருடன் ஒப்பிடுகையில் பெரிய அளவில் பற்றாக்குறை ஏற்பட்டுள்ளதாக சுட்டிக்காட்டினர். இதனால் மேட்டூர் அணையில் இருந்து குடிநீர் தேவைக்காக மட்டுமே தண்ணீர் திறக்கப்படும் சூழல் ஏற்பட்டுள்ளதாகவும் தெரிவித்தனர். இரு மாநிலங்களின் வாதங்களையும் கேட்ட காவிரி மேலாண்மை ஆணையம், மழைப்பொழிவு மற்றும் அணைகளின் நீர்வரத்தை மேலும் ஒரு வாரம் கண்காணித்து, பின்னர் அடுத்த கட்ட முடிவை எடுக்கலாம் என்று அறிவித்தது. இதற்காக காவிரி நீர் முறைப்படுத்தும் குழு கூட்டம் வரும் 28ஆம் தேதி நடைபெற உள்ளது. இதற்கிடையில், காவிரி நீர் விவகாரத்தில் உச்சநீதிமன்றத்தை மீண்டும் அணுக தமிழக அரசு சட்ட ஆலோசனைகளை மேற்கொண்டு வருவதாக தகவல்கள் வெளியாகியுள்ளன.