பும்ரா, வாஷிங்டன் சுந்தருக்கு வாய்ப்பு: ஆப்கானிஸ்தான் தொடருக்கான இந்திய அணி அறிவிப்பு

இந்தியா - ஆப்கானிஸ்தான் அணிகள் மோதும் மூன்று போட்டிகள் கொண்ட டி-20 தொடருக்கான இந்திய அணி அறிவிக்கப்பட்டுள்ளது. செப். 13, 15 மற்றும் 17 ஆகிய தேதிகளில் டில்லி அருண் ஜெட்லி மைதானத்தில் போட்டிகள் நடைபெறுகின்றன. இந்த அணியே ஜப்பானில் நடைபெற உள்ள ஆசிய விளையாட்டுப் போட்டியின் கிரிக்கெட் தொடரிலும் பங்கேற்க உள்ளது. காயத்திலிருந்து மீண்டு உடற்தகுதியை பெற்று வரும் பும்ரா, நிதிஷ் குமார் ரெட்டி, தமிழக வீரர் வாஷிங்டன் சுந்தர் மற்றும் ஹர்ஷித் ராணா ஆகியோருக்கு இந்திய அணியில் வாய்ப்பு அளிக்கப்பட்டுள்ளது. எனினும், அவர்களின் தேர்வு முழுமையான உடற்தகுதியை பொறுத்து அமையும் என தெரிவிக்கப்பட்டுள்ளது. ஹர்திக் பாண்ட்யா காயத்தில் இருந்து மீண்டிருந்தாலும், பந்துவீச்சின்போது காலில் ஏற்பட்ட வலி காரணமாக இந்தத் தொடருக்கான அணியில் இடம்பெறவில்லை. ஷ்ரேயஸ் ஐயர் தலைமையிலான அணியில் திலக் வர்மா துணை கேப்டனாக நியமிக்கப்பட்டுள்ளார். இளம் வீரர் வைபவ் சூர்யவன்ஷி, அபிஷேக் சர்மா, இஷான் கிஷான், சஞ்சு சாம்சன், ஷிவம் துபே உள்ளிட்டோர் அணியில் இடம்பிடித்துள்ளனர். தமிழகத்தைச் சேர்ந்த வாஷிங்டன் சுந்தர் மற்றும் வருண் சக்ரவர்த்தி ஆகியோரும் அணியில் இடம்பெற்றுள்ளனர். முந்தைய ஜிம்பாப்வே தொடரில் விளையாடிய ரிங்கு சிங், சூர்யான்ஷ் ஷெட்கே, பிரின்ஸ் யாதவ், பிரப்சிம்ரன் சிங், மயங்க் யாதவ் உள்ளிட்ட சில வீரர்கள் இந்த முறை நீக்கப்பட்டுள்ளனர். இந்திய அணி ஷ்ரேயஸ் ஐயர் (கேப்டன்), திலக் வர்மா (துணை கேப்டன்), அபிஷேக் சர்மா, வைபவ் சூர்யவன்ஷி, சஞ்சு சாம்சன், இஷான் கிஷான், ஷிவம் துபே, நிதிஷ் குமார் ரெட்டி*, பும்ரா*, அர்ஷ்தீப் சிங், ஹர்ஷித் ராணா*, அக்சர் படேல், வாஷிங்டன் சுந்தர்*, வருண் சக்ரவர்த்தி, ரவி பிஷ்னோய். * உடற்தகுதியை பொறுத்து ஜப்பானின் அய்ச்சி-நகோயாவில் செப். 19 முதல் அக். 4 வரை நடைபெற உள்ள ஆசிய விளையாட்டுப் போட்டியில் கிரிக்கெட்டும் இடம்பெற்றுள்ளது. நடப்பு சாம்பியனாக இந்திய ஆண்கள் மற்றும் பெண்கள் அணிகள் இதில் களமிறங்குகின்றன.