ராஜஸ்தான் அணிக்கு கடும் அதிர்ச்சி: பேட்டிங் சரிவு, ஐதராபாத் 57 ரன்கள் வித்தியாசத்தில் வெற்றி

ஐதராபாத்: நடப்பு கிரிக்கெட் லீக் தொடரில் ராஜஸ்தான் அணிக்கு முதல் பெரிய பின்னடைவு ஏற்பட்டுள்ளது. ஐதராபாத் ராஜிவ் சர்வதேச மைதானத்தில் நடைபெற்ற போட்டியில், ஐதராபாத் அணி 57 ரன்கள் வித்தியாசத்தில் வெற்றி பெற்றது. டாஸ் வென்ற ராஜஸ்தான் அணியின் கேப்டன் ரியான் பராக், பீல்டிங் தேர்வு செய்தார். முதலில் பேட்டிங் செய்த ஐதராபாத் அணிக்கு ஆரம்பத்திலேயே அதிர்ச்சி ஏற்பட்டது. ஜோப்ரா ஆர்ச்சர் வீசிய முதல் பந்திலேயே அபிஷேக் சர்மா ரன் எதுவும் எடுக்காமல் அவுட்டானார். ஆனால் அதன்பிறகு கேப்டன் இஷான் கிஷான் அதிரடியாக விளையாடி, 44 பந்துகளில் 91 ரன்கள் எடுத்தார். இதில் 6 சிக்சர்கள் மற்றும் 8 பவுண்டரிகள் அடங்கும். கிளாசன் (40), நிதிஷ் குமார் ரெட்டி (28) ஆகியோர் ஆதரவு அளித்தனர். இதனால் ஐதராபாத் அணி 20 ஓவரில் 216/6 என்ற பெரிய ஸ்கோரை பதிவு செய்தது. 217 ரன்கள் என்ற கடின இலக்கை துரத்திய ராஜஸ்தான் அணி, தொடக்கத்திலேயே சரிந்து விழுந்தது. வேகப்பந்துவீச்சாளர் பிரபுல் ஹிங்கே தனது முதல் ஓவரிலேயே 3 விக்கெட்டுகள் எடுத்து அதிர்ச்சி அளித்தார். 9 ரன்களுக்கு 5 விக்கெட்டுகளை இழந்த ராஜஸ்தான் அணி கடும் நெருக்கடியில் சிக்கியது. பின்னர் ரவிந்திர ஜடேஜா (45), டோனோவன் பெரெய்ரா (69) இணைந்து 118 ரன்கள் கூட்டணி அமைத்து போராடினர். ஆனால் மற்ற வீரர்கள் ஒத்துழைக்காததால் அணி 19 ஓவரில் 159 ரன்களுக்கு அவுட்டானது. ஐதராபாத் அணிக்காக பிரபுல் ஹிங்கே மற்றும் சாகிப் ஹுசைன் தலா 4 விக்கெட்டுகள் வீழ்த்தினர்.