சென்னை அணி பேட்டிங் சரிவு: முதல் போட்டியிலேயே ராஜஸ்தானிடம் தோல்வி

அசாம் மாநிலம் கவுகாத்தியில் நடைபெற்ற ஐபிஎல் லீக் போட்டியில், சென்னை அணி தனது முதல் போட்டியிலேயே தோல்வியை சந்தித்தது. 8 விக்கெட் வித்தியாசத்தில் ராஜஸ்தான் அணி வெற்றி பெற்றது. 'டாஸ்' வென்ற ராஜஸ்தான் கேப்டன் ரியான் பராக் பந்துவீச்சை தேர்வு செய்தார். சென்னை அணியில் முக்கிய வீரர் தோனி கால் தசை பிடிப்பு காரணமாக இந்த போட்டியில் பங்கேற்கவில்லை. அவருக்குப் பதிலாக விக்கெட் கீப்பராக கார்த்திக் சர்மா அறிமுகமானார். பேட்டிங்கில் சென்னை அணியின் டாப் ஆர்டர் முற்றிலும் சரிந்தது. கேப்டன் ருதுராஜ் மற்றும் சஞ்சு சாம்சன் துவக்கத்தில் சற்றே நம்பிக்கை அளித்தாலும், விரைவில் அவுட்டானார்கள். சாம்சன் 6 ரன்களில் வெளியேறினார். அடுத்தடுத்து விக்கெட்டுகள் விழுந்ததால் சென்னை அணி 9 ஓவர்களில் 62/6 என திணறியது. பின்னர் கார்த்திக் சர்மா மற்றும் ஓவர்டன் சிறிது போராடினாலும், அணி 127 ரன்களுக்கு ஆல் அவுட்டானது. எளிய இலக்கை துரத்திய ராஜஸ்தான் அணிக்கு ஜெய்ஸ்வால் மற்றும் 15 வயது இளம் வீரர் வைபவ் சூர்யவன்ஷி அதிரடி துவக்கம் கொடுத்தனர். வைபவ் 17 பந்துகளில் 52 ரன்கள் அடித்து ஆட்டத்தை கட்டுக்குள் கொண்டு வந்தார். இறுதியில் ராஜஸ்தான் அணி 12.1 ஓவர்களில் 128/2 ரன்கள் எடுத்து எளிதில் வெற்றி பெற்றது. ஜெய்ஸ்வால் 38 ரன்களுடன் அவுட்டாகாமல் இருந்தார். இந்த போட்டியில் சாம்சன் சென்னை அணியில் இணைந்திருந்தாலும், பெரும் தாக்கம் ஏற்படுத்தவில்லை. மாறாக ராஜஸ்தானுக்கு சென்ற ஜடேஜா தனது பந்துவீச்சில் முக்கிய விக்கெட்டுகளை வீழ்த்தி அணிக்கு பலம் சேர்த்தார். தோனி இல்லாமல் சென்னை அணி களமிறங்கியது இது முதல் முறை என்பது குறிப்பிடத்தக்கது.