குஜராத்தில் ஜெய்ஷ்-இ-முகமது சதி முறியடிப்பு; 8 பேர் கைது, டிஜிட்டல் ஆதாரங்கள் பறிமுதல்

குஜராத்தில் பயங்கரவாத சதித்திட்டம் தீட்டியதாக சந்தேகிக்கப்படும் 8 பேரை பாதுகாப்பு அமைப்புகள் கைது செய்துள்ளன. விசாரணையில், அவர்கள் பாகிஸ்தானில் செயல்படும் தடைசெய்யப்பட்ட ஜெய்ஷ்-இ-முகமது அமைப்புடன் தொடர்பில் இருந்ததாகவும், அதன் கொள்கைகளை உருதுவில் இருந்து குஜராத்தி மொழிக்கு மொழிபெயர்த்து பரப்பியதாகவும் அதிகாரிகள் தெரிவித்துள்ளனர். கைது செய்யப்பட்டவர்கள் பயங்கரவாத நடவடிக்கைகளுக்காக சதி செய்ததுடன், அதற்காக ரூ.3 லட்சம் பெற்றதாகவும், அந்த பணத்தில் பழைய கார் ஒன்றை வாங்கியதாகவும் விசாரணையில் தெரியவந்துள்ளது. அவர்களிடம் நடத்தப்பட்ட சோதனையில் 254 டிஜிட்டல் ஆவணங்கள், ஜிகாதி தொடர்புடைய புத்தகங்கள், உரைகள், ஆடியோ மற்றும் வீடியோ பதிவுகள், புகைப்படங்கள், அமைப்பின் கொடிகள், மொபைல் போன்கள் உள்ளிட்ட பொருட்கள் பறிமுதல் செய்யப்பட்டன. மேலும், மசூத் அசார் எழுதிய புத்தகங்கள், அமைப்பில் சேர அனுமதி கோரும் கடிதங்கள் மற்றும் அமைப்பின் கொள்கைகள் அடங்கிய குறிப்புகளும் கைப்பற்றப்பட்டுள்ளன. கைது செய்யப்பட்டவர்கள் குஜராத் மற்றும் மத்திய பிரதேச மாநிலங்களைச் சேர்ந்தவர்கள். அவர்கள் மீது சட்டவிரோத நடவடிக்கைகள், பயங்கரவாத நிதி திரட்டுதல், சதி, பயங்கரவாத அமைப்புகளுக்கு ஆதரவு மற்றும் குற்றச் சதி உள்ளிட்ட பல்வேறு சட்டப்பிரிவுகளின் கீழ் வழக்குப்பதிவு செய்து விசாரணை நடத்தப்பட்டு வருகிறது.