கடைசி நிமிட கோலில் பிரேசில் வெற்றி: ஜப்பானின் உலகக் கோப்பை கனவு முடிவு

உலகக் கோப்பை கால்பந்து தொடரின் 'ரவுண்டு-32' போட்டியில், கடைசி நிமிடத்தில் அடிக்கப்பட்ட கோலின் உதவியுடன் பிரேசில் அணி ஜப்பானை 2-1 என்ற கோல் கணக்கில் வீழ்த்தி 'ரவுண்டு-16' சுற்றுக்கு முன்னேறியது. அமெரிக்காவின் ஹூஸ்டன் நகரில் நடைபெற்ற இந்த போட்டியில், உலக தரவரிசையில் ஐந்தாவது இடத்தில் உள்ள பிரேசில் அணி, 17-வது இடத்தில் உள்ள ஜப்பானை சந்தித்தது. நட்சத்திர வீரர் நெய்மர் இந்த ஆட்டத்தில் விளையாடவில்லை. ஆட்டத்தின் 29-வது நிமிடத்தில் கைஷு சானோ கோல் அடித்து ஜப்பானை முன்னிலைக்கு கொண்டு சென்றார். முதல் பாதி முழுவதும் பிரேசில் அதிக நேரம் பந்தை தங்கள் கட்டுப்பாட்டில் வைத்திருந்தாலும், கோல் அடிக்க முடியாமல் 0-1 என்ற கணக்கில் பின்தங்கியது. இரண்டாவது பாதியின் 56-வது நிமிடத்தில் கேஸ்மிரோ தலையால் முட்டி கோல் அடித்து பிரேசிலுக்கு சமநிலை ஏற்படுத்தினார். அதன்பின் வினிசியஸ் ஜூனியரின் கோல் முயற்சி கோல் கம்பத்தில் மோதியதால், முன்னிலை பெறும் வாய்ப்பு நழுவியது. போட்டி கூடுதல் நேரத்தை எட்டிய நிலையில், 90+5-வது நிமிடத்தில் புருனோ குய்மரேஸின் துல்லியமான பாஸை கேப்ரியல் மார்டினெல்லி கோலாக மாற்றி பிரேசிலுக்கு 2-1 என்ற திரில் வெற்றியை உறுதி செய்தார். இந்த வெற்றியின் மூலம் பிரேசில் 'ரவுண்டு-16' சுற்றுக்கு முன்னேறி, அடுத்த போட்டியில் ஐவரி கோஸ்ட் அல்லது நார்வே அணியை சந்திக்க உள்ளது. ஜப்பான் அணி தொடரிலிருந்து வெளியேறியது. ஹூஸ்டனில் நடைபெற்ற இந்த பரபரப்பான போட்டியை காண 68,777 ரசிகர்கள் மைதானத்தில் திரண்டிருந்தனர்.