புதுச்சேரி தேர்தல்: காங்கிரசை விமர்சித்த திருமாவளவன் – வி.சி.க. தனித்து போட்டி அறிவிப்பு

சென்னை: புதுச்சேரி சட்டசபை தேர்தலை முன்னிட்டு ‘இண்டி’ கூட்டணியில் ஏற்பட்ட குழப்பம் தற்போது தீவிரமடைந்துள்ளது. காங்கிரஸ் மற்றும் தி.மு.க. இடையிலான தொகுதி பங்கீட்டில் ஏற்பட்ட கருத்து வேறுபாடு காரணமாக, கூட்டணியில் உள்ள மற்ற கட்சிகளுக்கு இடமளிக்கப்படாத நிலை உருவாகியுள்ளது. விடுதலை சிறுத்தைகள் கட்சி (வி.சி.க.) தலைவர் திருமாவளவன், உழவர்கரை தொகுதியை ஒதுக்கினால் கூட்டணியில் தொடர்வோம் என்று முன்பே தெரிவித்திருந்தார். தி.மு.க. அதற்கு சம்மதம் தெரிவித்திருந்தாலும், காங்கிரஸ் வேட்பாளர் தனது வேட்புமனுவை வாபஸ் பெற மறுத்துள்ளார். இதனால், கூட்டணியில் வி.சி.க.க்கு இடமுண்டா என்பது குறித்து தெளிவில்லாத சூழல் உருவானது. இந்த அணுகுமுறையை கடுமையாக விமர்சித்த திருமாவளவன், காங்கிரசின் செயல்பாடு கூட்டணியின் வெற்றி வாய்ப்பையே பாதிக்கக்கூடும் என்று கூறினார். இந்நிலையில், வேறு வழியின்றி புதுச்சேரியில் மூன்று தொகுதிகளில் வி.சி.க. தனித்து போட்டியிட முடிவு செய்துள்ளது. ஊசுடு தொகுதியில் அரியபுத்ரி, நெட்டப்பாக்கம் தொகுதியில் அமுதவன், உழவர்கரை தொகுதியில் புஷ்பலதா ஆகியோர் வேட்பாளர்களாக அறிவிக்கப்பட்டுள்ளனர்.