உடல்நிலை பாதிப்பிலும் காட்பாடியில் பிரசாரம் தொடங்கிய துரைமுருகன்

காட்பாடி: வயது முதிர்வு மற்றும் உடல்நலக்குறைவால் அவதிப்பட்டு வந்தாலும், தி.மு.க. பொதுச் செயலாளரும் அமைச்சருமான துரைமுருகன் காட்பாடி தொகுதியில் தனது தேர்தல் பிரசாரத்தை உற்சாகமாக தொடங்கினார். வேலூர் மாவட்டத்தில் நீண்ட அரசியல் அனுபவம் கொண்ட துரைமுருகன், காட்பாடி தொகுதியில் 10 முறை மற்றும் ராணிப்பேட்டை தொகுதியில் 2 முறை போட்டியிட்டு, மொத்தம் 12 தேர்தல்களில் 10 முறை வெற்றி பெற்றவர். இந்த முறை மீண்டும் காட்பாடியில் போட்டியிடுகிறார். சென்னையில் இருந்து ரயிலில் காட்பாடி வந்த அவர், திறந்தவெளி வாகனத்தில் பேரணியாக புறப்பட்டு பிரசாரத்தை துவக்கினார். அவருடன் அவரது மகனும் தி.மு.க. எம்.பி.யுமான கதிர் ஆனந்த் கலந்து கொண்டார். உடல்நிலை மற்றும் வயது காரணமாக துரைமுருகனுக்கு பேசுவதில் சிரமம் ஏற்பட்டது. முதல் பிரசார கூட்டத்திலேயே அவர் முழுமையாக உரையாற்ற முடியாத நிலை காணப்பட்டது. தி.மு.க. வட்டாரங்கள் கூறுகையில், 87 வயதான துரைமுருகனுக்கு வயது காரணமாக சீட் வழங்குவது குறித்து சந்தேகம் இருந்தபோதிலும், அவரது அனுபவமும் செல்வாக்கும் காரணமாக மீண்டும் வாய்ப்பு வழங்கப்பட்டுள்ளது. கோடை காலத்தில் அதிக வெப்பநிலை காணப்படும் வேலூர் பகுதியில் பிரசாரம் செய்வது துரைமுருகனுக்கு சவாலாக இருக்கும் என்றும் கூறப்படுகிறது. சமீப காலமாக அவர் காரை தவிர்த்து ரயில் பயணத்தை அதிகமாக பயன்படுத்தி வருகிறார்.