உடனடி நடவடிக்கை: 717 டாஸ்மாக் மதுக்கடைகள் மூட உத்தரவு – முதல்வர் விஜய் அதிரடி முடிவு

தமிழகத்தில் பொதுமக்கள் நலனை முன்னிட்டு முக்கியமான நடவடிக்கையாக, விஜய் தலைமையிலான அரசு 717 டாஸ்மாக் மதுக்கடைகளை மூட உத்தரவிட்டுள்ளது. தமிழக அரசின் டாஸ்மாக் நிறுவனம் மூலம் தற்போது 4,765 சில்லறை கடைகள் வழியாக மதுபானங்கள் விற்பனை செய்யப்படுகின்றன. 2003ஆம் ஆண்டு மதுபான சில்லறை விற்பனை விதிகளின்படி, மாநகராட்சி மற்றும் நகராட்சி பகுதிகளில் வழிபாட்டு தலங்கள் மற்றும் கல்வி நிறுவனங்களிலிருந்து 50 மீட்டர் தூரத்திற்குள், மற்ற பகுதிகளில் 100 மீட்டர் தூரத்திற்குள் மதுக்கடைகள் அமைக்கக் கூடாது. ஆனால் பல இடங்களில் இந்த விதிமுறைகள் பின்பற்றப்படாததால், பொதுமக்கள் தொடர்ந்து எதிர்ப்பு தெரிவித்து வந்தனர். இதையடுத்து, வழிபாட்டு தலங்கள், கல்வி நிறுவனங்கள் மற்றும் பேருந்து நிலையங்களிலிருந்து 500 மீட்டர் சுற்றளவில் உள்ள கடைகளை ஆய்வு செய்ய முதல்வர் உத்தரவிட்டார். அதன்படி நடத்தப்பட்ட ஆய்வில் மொத்தம் 717 கடைகள் கண்டறியப்பட்டன. இதில்: 276 கடைகள் – வழிபாட்டு தலங்கள் அருகில் 186 கடைகள் – கல்வி நிறுவனங்கள் அருகில் 255 கடைகள் – பேருந்து நிலையங்கள் அருகில் இந்த அனைத்து கடைகளையும் அடுத்த இரண்டு வாரங்களுக்குள் மூடுமாறு அதிகாரிகளுக்கு உத்தரவிடப்பட்டுள்ளது. ஏற்கனவே சில பகுதிகளில் நடவடிக்கை தொடங்கப்பட்டுள்ளது. சென்னை, சேலம், திருச்சி, மதுரை, கோவை உள்ளிட்ட மண்டலங்களில் ஒரே நாளில் 50 கடைகள் மூடப்பட்டுள்ளன. மேலும், ரயில் நிலையங்களுக்கு அருகில் உள்ள டாஸ்மாக் கடைகள் குற்றச்செயல்களுக்கு காரணமாக இருப்பதாக ரயில்வே பாதுகாப்பு படை தெரிவித்துள்ளது. குறிப்பாக, சென்னை, திருவள்ளூர், காஞ்சிபுரம் உள்ளிட்ட மாவட்டங்களில் 39 கடைகள் ரயில் நிலையங்களுக்கு மிக அருகில் இருப்பது கண்டறியப்பட்டுள்ளது. இந்த நடவடிக்கையை பல்வேறு அரசியல் தலைவர்கள் வரவேற்றுள்ளனர். அதே நேரத்தில், டாஸ்மாக் ஊழியர்களுக்கு மாற்று வேலை வாய்ப்பு வழங்க வேண்டும் என்ற கோரிக்கையும் எழுந்துள்ளது.