சாலையோர கடையில் ஜல்முரி சுவைத்த பிரதமர் மோடி – மேற்கு வங்க பிரசாரத்தில் கவனம் ஈர்த்த தருணம்

மேற்கு வங்கத்தில் நடைபெற உள்ள சட்டசபை தேர்தலை முன்னிட்டு தீவிர பிரசாரத்தில் ஈடுபட்டு வரும் பிரதமர் நரேந்திர மோடி, இன்று ஜார்கிராமில் நடந்த பிரசார பயணத்தின் போது சுவாரஸ்யமான சம்பவம் ஒன்றை ஏற்படுத்தினார். பிரசார கூட்டங்களுக்கு செல்லும் வழியில் திடீரென தனது வாகனத்தை நிறுத்திய அவர், அருகிலிருந்த சாலையோர கடைக்கு சென்று அங்கிருந்த பிரபலமான “ஜல்முரி” சிற்றுண்டியை வாங்கி சுவைத்தார். இந்த நிகழ்வு அங்கிருந்த மக்களிடையே ஆச்சரியத்தையும் மகிழ்ச்சியையும் ஏற்படுத்தியது. கடை உரிமையாளருடன் சில நிமிடங்கள் உரையாடிய பிரதமர், வாங்கிய ஜல்முரிக்கான பணத்தை வழங்க முயன்றார். முதலில் கடைக்காரர் பணத்தை ஏற்க மறுத்தாலும், பிரதமர் வற்புறுத்தியதால் இறுதியில் அவர் அதை பெற்றுக்கொண்டார். இந்த நிகழ்வின் புகைப்படங்கள் மற்றும் வீடியோக்கள் சமூக வலைதளங்களில் வைரலாக பரவி வருகின்றன. ஜல்முரி என்பது பொரி, கடலை, வெங்காயம், தக்காளி, வெள்ளரி மற்றும் பல்வேறு மசாலா பொருட்கள் சேர்த்து தயாரிக்கப்படும் மேற்கு வங்கத்தின் பிரபலமான சிற்றுண்டி ஆகும்.