ஆக்கிரமிப்பு காஷ்மீரில் போராட்டம் தீவிரம்; முசாபராபாத்தை நோக்கி ஆயிரக்கணக்கானோர் பேரணி

பாகிஸ்தான் ஆக்கிரமிப்பில் உள்ள காஷ்மீர் பகுதியில் நடைபெற்று வரும் மக்கள் போராட்டம் மேலும் தீவிரமடைந்துள்ளது. கடந்த 52 நாட்களாக தொடர் போராட்டத்தில் ஈடுபட்டு வரும் அவாமி அதிரடி கூட்டுக்குழு (JACC) உறுப்பினர்கள், ராவல்கோட்டில் இருந்து முசாபராபாத் நகரை நோக்கி ஆயிரக்கணக்கானோர் கலந்து கொண்ட பேரணியை நடத்தினர். ஆக்கிரமிப்பு காஷ்மீரில் சட்டசபையில் அகதிகளுக்கான இடஒதுக்கீடு, விலைவாசி உயர்வு உள்ளிட்ட பிரச்னைகளை எதிர்த்து கடந்த மாதம் முதல் போராட்டங்கள் நடைபெற்று வருகின்றன. இந்தப் போராட்டங்களின் போது வன்முறை சம்பவங்களும் உயிரிழப்புகளும் பதிவாகியுள்ளன. இந்நிலையில், அப்பகுதியில் நடைபெற்ற தேர்தலின்போது பல இடங்களில் வன்முறை மற்றும் முறைகேடுகள் நடந்ததாக தகவல்கள் வெளியாகின. போராட்டத்தை முன்னெடுத்து வரும் அவாமி அதிரடி கூட்டுக்குழு, போராட்டக்காரர்கள் மீது பதிவு செய்யப்பட்ட வழக்குகளை ரத்து செய்ய வேண்டும் உள்ளிட்ட பல்வேறு கோரிக்கைகளை அரசிடம் முன்வைத்திருந்தது. இந்தக் கோரிக்கைகளை நிறைவேற்றுவதற்கு குறிப்பிட்ட காலக்கெடுவும் விதிக்கப்பட்டிருந்தது. ஆனால், அதிகாரிகளுடன் நடைபெற்ற பேச்சுவார்த்தை எந்த முடிவும் எட்டாததால், போராட்டக்காரர்கள் ராவல்கோட்டில் இருந்து முசாபராபாத் நோக்கி பேரணியாக புறப்பட்டனர். பேரணியை பாதுகாப்புப் படையினர் தடுக்க முயன்றதால் அப்பகுதியில் பதற்றமான சூழல் நிலவியதாக தகவல்கள் தெரிவிக்கின்றன.