காமன்வெல்த் பளுதூக்குதலில் தங்கம் வென்ற மீராபாய் சானு; வரலாற்றுச் சாதனை படைத்து இந்தியாவுக்கு பெருமை

ஸ்காட்லாந்தின் கிளாஸ்கோவில் நடைபெற்று வரும் 2026 காமன்வெல்த் விளையாட்டுப் போட்டியில், இந்தியாவின் நட்சத்திர பளுதூக்குதல் வீராங்கனை மீராபாய் சானு தங்கப் பதக்கம் வென்று அசத்தியுள்ளார். மகளிர் 48 கிலோ எடைப்பிரிவில் பங்கேற்ற அவர், ஸ்னாட்ச் மற்றும் க்ளீன் அண்ட் ஜெர்க் பிரிவுகளில் மொத்தம் 190 கிலோ (85+105) எடையைத் தூக்கி முதலிடம் பிடித்தார். இந்தப் போட்டியில் நைஜீரியாவின் நியாங் வெள்ளிப் பதக்கத்தையும், மலேசியாவின் ஹென்ரி வெண்கலப் பதக்கத்தையும் வென்றனர். மீராபாய் சானு, க்ளீன் அண்ட் ஜெர்க் சுற்றில் 105 கிலோ எடையைத் தூக்கி, அந்தப் பிரிவில் அதிக எடையைத் தூக்கிய வீராங்கனை என்ற புதிய உலகச் சாதனையையும் படைத்துள்ளார். இந்த வெற்றியின் மூலம், காமன்வெல்த் விளையாட்டுப் போட்டிகளில் தனது 3வது தங்கப் பதக்கத்தையும், மொத்தமாக 4வது பதக்கத்தையும் மீராபாய் சானு கைப்பற்றியுள்ளார். இதற்கு முன்பு, 2014-ல் வெள்ளிப் பதக்கமும், 2018 மற்றும் 2022 காமன்வெல்த் போட்டிகளில் தங்கப் பதக்கங்களும் வென்றிருந்தார். ஆடவர் 60 கிலோ எடைப்பிரிவில் ரிஷிகாந்தா சிங் வெள்ளிப் பதக்கம் வென்றதைத் தொடர்ந்து, 2026 காமன்வெல்த் போட்டியில் பளுதூக்குதலில் இந்தியாவுக்குக் கிடைத்த இரண்டாவது பதக்கம் இதுவாகும். ஒட்டுமொத்தமாக இந்தியா மூன்று பதக்கங்களுடன் பதக்கப்பட்டியலில் 7வது இடத்தில் உள்ளது. மீராபாய் சானுவின் வெற்றிக்கு பிரதமர் நரேந்திர மோடி வாழ்த்து தெரிவித்துள்ளார். தனது சமூக வலைதள பதிவில், "மீராபாய் சானு மீண்டும் தனது அசாதாரண திறமையை நிரூபித்து தங்கப் பதக்கம் வென்றுள்ளார். காமன்வெல்த் போட்டிகளில் தொடர்ந்து பதக்கங்களை வென்று இந்தியாவுக்கு பெருமை சேர்த்து வருகிறார். அவரது சாதனை ஒவ்வொரு இந்தியருக்கும் உத்வேகமாக அமைகிறது. எதிர்கால வெற்றிகளுக்கும் வாழ்த்துகள்" என்று குறிப்பிட்டுள்ளார்.