சபரிமலை வழக்கு: “மக்களின் நம்பிக்கையை தவறென அறிவிப்பது சவால்” – உச்ச நீதிமன்றம்

சபரிமலை அய்யப்பன் கோவில் தொடர்பான வழக்கில், மத நம்பிக்கைகள் மற்றும் பாலின சமத்துவ உரிமைகள் குறித்து உச்ச நீதிமன்றம் முக்கியமான கருத்துகளை வெளியிட்டுள்ளது. அனைத்து வயது பெண்களையும் சபரிமலை கோவிலில் அனுமதிக்கக் கோரும் மனுவை விசாரிக்கும் போது, ஒன்பது நீதிபதிகள் அடங்கிய அரசியல் சாசன அமர்வு, “லட்சக்கணக்கான மக்களின் நம்பிக்கையை தவறானது என அறிவிப்பது நீதிமன்றத்திற்கு சவாலானது” எனக் குறிப்பிட்டது. தலைமை நீதிபதி சூர்யகாந்த் தலைமையிலான அமர்வில், நீதிபதிகள் நாகரத்னா மற்றும் ஜாய்மால்யா பக்சி ஆகியோர் பல்வேறு கேள்விகளை எழுப்பினர். மத நம்பிக்கைகள் மற்றும் அதன் நடைமுறைகள் குறித்து நீதிமன்றங்கள் எந்த அளவிற்கு தலையிட முடியும் என்பது தொடர்பாக முக்கிய விவாதங்கள் நடந்தன. குறிப்பாக, “மதத்திற்குள் பாகுபாடுகள் இருந்தால் நீதிமன்றம் தலையிட வேண்டுமா?” மற்றும் “அத்தியாவசிய மத நடைமுறைகளை யார் தீர்மானிக்க வேண்டும்?” போன்ற கேள்விகள் முன்வைக்கப்பட்டன. திருவிதாங்கூர் தேவஸ்வம் போர்டு சார்பில் ஆஜரான மூத்த வழக்கறிஞர் சிங்வி, மத நடைமுறைகள் சமூகத்தின் நம்பிக்கையை அடிப்படையாகக் கொண்டவை என்பதால், அவற்றை புறநிலைக் கண்ணோட்டத்தில் மதிப்பீடு செய்வது அரசியல் சாசன உரிமைகளை பாதிக்கக்கூடும் என வாதிட்டார். மேலும், சபரிமலையில் பெண்களுக்கு விதிக்கப்பட்ட வயது வரம்பு பாலின பாகுபாடு அல்ல, அது அய்யப்பனின் “நைஷ்டிக பிரம்மச்சாரி” தன்மையுடன் தொடர்புடையது என்றும் அவர் விளக்கினார். அரசு சமூக நலன், சுகாதாரம் மற்றும் பொது ஒழுங்கு போன்ற காரணங்களுக்காக மட்டுமே மத நிர்வாகத்தில் தலையிட முடியும் என்றும், மத சடங்குகளை நேரடியாக மாற்ற அதிகாரம் இல்லை என்றும் வாதிக்கப்பட்டது. இந்த வழக்கில் மேலதிக விசாரணை தொடர்ந்து நடைபெற்று வருகிறது.