சென்னையில் புலம்பெயர் தொழிலாளி குடும்பம் கொலை: இபிஎஸ், அண்ணாமலை கண்டனம்; கனிமொழி இரங்கல்

சென்னை:
சென்னையின் தரமணி பாலிடெக்னிக் கல்லூரி அருகே புலம்பெயர் தொழிலாளி குடும்பம் கொடூரமாக கொல்லப்பட்ட சம்பவம் தமிழகத்தில் பெரும் அதிர்ச்சியை ஏற்படுத்தியுள்ளது. இச்சம்பவத்திற்கு எதிர்க்கட்சி தலைவர் எடப்பாடி பழனிசாமி (இபிஎஸ்) மற்றும் தமிழக பாஜ முன்னாள் தலைவர் அண்ணாமலை ஆகியோர் கடும் கண்டனம் தெரிவித்துள்ளனர்.

பீஹார் மாநிலத்தைச் சேர்ந்த கவுரவ் குமார், அவரது மனைவி மற்றும் 2 வயது குழந்தை ஆகிய மூவரும் மதுபோதையில் இருந்த கும்பலால் தாக்கப்பட்டு கொல்லப்பட்டதாக கூறப்படுகிறது. இந்த கொடூர சம்பவம் தமிழகத்தில் சட்டம் ஒழுங்கு நிலை கேள்விக்குறியாகியுள்ளது என இபிஎஸ் தனது அறிக்கையில் தெரிவித்துள்ளார்.

சென்னையின் மையப்பகுதியில் இதுபோன்ற சம்பவம் நடந்துள்ளது திமுக அரசின் நிர்வாக தோல்வியை காட்டுவதாக அண்ணாமலை குற்றம் சாட்டியுள்ளார். புலம்பெயர் தொழிலாளர்களின் பாதுகாப்பு உறுதி செய்யப்பட வேண்டும் என்றும் அவர் வலியுறுத்தினார்.

இதற்கிடையே, திமுக எம்.பி. கனிமொழி இந்த சம்பவத்திற்கு கடும் வருத்தம் தெரிவித்ததுடன், குற்றவாளிகள் உடனடியாக கைது செய்யப்பட்டு கடுமையான தண்டனை வழங்கப்பட வேண்டும் என வலியுறுத்தியுள்ளார். காவல்துறையினர் தீவிர விசாரணை மேற்கொண்டு வருகின்றனர்.