சென்னை-தஞ்சையில் கள்ளநோட்டு வலை; பாகிஸ்தான் தொடர்பு உள்ளதா? தீவிர விசாரணை

சென்னை மற்றும் தஞ்சாவூரில் செயல்பட்டதாக கூறப்படும் கள்ளநோட்டு கும்பலை போலீசார் கைது செய்து, அவர்களிடம் இருந்து போலி இந்திய ரூபாய் நோட்டுகள், அசல் பணம் மற்றும் வெளிநாட்டு நாணயங்களை பறிமுதல் செய்துள்ளனர். இந்த வழக்கில் சர்வதேச தொடர்பு இருக்கிறதா என்பது குறித்து விசாரணை தீவிரப்படுத்தப்பட்டுள்ளது. திருவல்லிக்கேணியை சேர்ந்த ஷபீக் ரகுமான் என்பவர் கைது செய்யப்பட்ட நிலையில், அவரிடம் இருந்து ரூ.11 லட்சம் மதிப்புள்ள கள்ளநோட்டுகள், ரூ.11.21 லட்சம் அசல் இந்திய ரூபாய் மற்றும் ரூ.27.59 லட்சம் மதிப்பிலான வெளிநாட்டு நாணயங்கள் கைப்பற்றப்பட்டதாக போலீசார் தெரிவித்தனர். அவரது வாக்குமூலத்தின் அடிப்படையில் தஞ்சாவூரை சேர்ந்த ரவிச்சந்திரனும் கைது செய்யப்பட்டார். அவரிடமிருந்து ரூ.22.79 லட்சம் பணம் பறிமுதல் செய்யப்பட்டது. கைதானவர்களிடம் இருந்த பாஸ்போர்ட்களை ஆய்வு செய்ததில், அவர்கள் பாகிஸ்தான் உள்ளிட்ட சில வெளிநாடுகளுக்கு பயணம் செய்திருப்பது தெரியவந்துள்ளது. வெளிநாட்டு பயணங்கள் மற்றும் அங்கு சந்தித்த நபர்கள் குறித்த தகவல்களில் முரண்பாடுகள் இருப்பதால், இந்த கும்பலுக்கு பின்னால் சர்வதேச குற்றவியல் அல்லது தீவிரவாத தொடர்புகள் உள்ளனவா என்பதை போலீசார் பல்வேறு கோணங்களில் ஆராய்ந்து வருகின்றனர். மேலும், கைப்பற்றப்பட்ட மொபைல் போன்கள் மற்றும் தொடர்பு விவரங்களும் ஆய்வு செய்யப்பட்டு வருகின்றன. இந்த வழக்கில் தொடர்புடையதாக கருதப்படும் சென்னையை சேர்ந்த ஒரு பெண்ணிடமும் விசாரணை நடைபெற்று வருகிறது.