ஹைதராபாத் பள்ளியில் சர்ச்சை; மாணவருக்கு மத நடைமுறை வீட்டுப்பாடம் வழங்கிய ஆசிரியை நீக்கம்

தெலுங்கானா மாநிலம் ஹைதராபாத் அருகே உள்ள ஒரு தனியார் பள்ளியில், இரண்டாம் வகுப்பு மாணவருக்கு மத சார்ந்த வீட்டுப்பாடம் வழங்கப்பட்டதாக எழுந்த புகாரைத் தொடர்ந்து, சம்பந்தப்பட்ட ஆசிரியையை பள்ளி நிர்வாகம் பணிநீக்கம் செய்துள்ளது. சயீதாபாத் பகுதியில் செயல்படும் தனியார் பள்ளியில் படிக்கும் மாணவருக்கு வழங்கப்பட்ட வீட்டுப்பாடத்தில், குறிப்பிட்ட மதத்தின் வழிபாட்டு நடைமுறையை மேற்கொள்ளுமாறு குறிப்பிடப்பட்டிருந்ததாக கூறப்படுகிறது. இதை கவனித்த மாணவரின் பெற்றோர் பள்ளி நிர்வாகத்திடம் விளக்கம் கேட்டதுடன், இதுபோன்ற செயல்கள் மீண்டும் நடைபெறக்கூடாது என வலியுறுத்தினர். விசாரணையில், வகுப்பாசிரியை ஷேக் ஆயிஷா பர்வீன் தவறுதலாக அந்த வீட்டுப்பாடத்தை வழங்கியதாக பள்ளி நிர்வாகம் தெரிவித்தது. இருப்பினும், பெற்றோரின் எதிர்ப்பை தொடர்ந்து, ஆசிரியையை பணிநீக்கம் செய்ததாக தகவல் வெளியாகியுள்ளது. மேலும், இந்த சம்பவம் தொடர்பாக பெற்றோர் போலீசிலும் புகார் அளித்துள்ள நிலையில், அதிகாரிகள் சம்பவத்தின் பின்னணி குறித்து விசாரணை மேற்கொண்டு வருகின்றனர்.