பதவி, 'சீட்' ஏமாற்றம்: காங்கிரஸிலிருந்து தவெக-வுக்கு நகரும் சிதம்பரம் ஆதரவாளர்கள்?

தமிழக காங்கிரஸ் கட்சியில் பதவிகள் மற்றும் தேர்தல் வாய்ப்புகள் கிடைக்காத அதிருப்தி காரணமாக, முன்னாள் மத்திய அமைச்சர் ப. சிதம்பரத்தின் ஆதரவாளர்களில் சிலர் மாற்றுக் கட்சிகளை நோக்கி நகர்ந்து வருவதாக அரசியல் வட்டாரங்களில் தகவல்கள் வெளியாகியுள்ளன. தமிழகம் முழுவதும் ப. சிதம்பரம் மற்றும் அவரது மகன் கார்த்தி சிதம்பரத்திற்கு ஆதரவாளர்கள் உள்ளனர். முன்னாள் மாநில தலைவர் ஈ.வி.கே.எஸ். இளங்கோவனின் ஆதரவாளர்களில் பலரும் இந்த அணியில் இருந்து வந்ததாக கூறப்படுகிறது. சமீபத்திய சட்டசபைத் தேர்தலின் போது, தனது ஆதரவாளர்களுக்கு போட்டியிட வாய்ப்பு கிடைக்க வேண்டும் என்று கட்சியின் மேலிடத்தில் சிதம்பரம் முயற்சி செய்ததாக கூறப்பட்டாலும், எதிர்பார்த்த அளவில் சீட் கிடைக்கவில்லை என்ற அதிருப்தி நிலவுவதாக தகவல்கள் தெரிவிக்கின்றன. இதன் விளைவாக, சிதம்பரத்திற்கு நெருக்கமாக இருந்த சில மாநில மற்றும் மாவட்ட நிர்வாகிகள் அவரிடமிருந்து விலகி வருவதாகவும் கூறப்படுகிறது. இந்த நிலையில், தமிழக காங்கிரஸ் முன்னாள் பொதுச்செயலர் சுந்தர்ராஜன் தலைமையில் ஆயிரக்கணக்கானோர் வரும் 19-ஆம் தேதி தவெக-வில் இணைய உள்ளதாக தகவல் வெளியாகியுள்ளது. மேலும், முன்னாள் மாநிலத் தலைவர் செல்வப்பெருந்தகை தலைமையிலான காலகட்டத்தில் சிதம்பரம் ஆதரவாளர்களுக்கு போதிய கட்சிப் பொறுப்புகளும் தேர்தல் வாய்ப்புகளும் வழங்கப்படவில்லை என்ற குற்றச்சாட்டும் எழுந்துள்ளது. இதனால், சிதம்பரம் அணியைச் சேர்ந்த சில முக்கிய நிர்வாகிகள் தற்போது மாநில காங்கிரஸ் தலைவர் மாணிக்கம் தாகூர் தலைமையிலான அணிக்கு மாறியுள்ளதாகவும் கூறப்படுகிறது. அரசியல் வட்டாரங்களின் கருத்துப்படி, மாநில அல்லது தேசிய அளவில் சிதம்பரத்திற்கு முக்கிய பொறுப்பு வழங்கப்பட்டால் மட்டுமே அவரது அணியில் உள்ள ஆதரவாளர்களை தொடர்ந்து ஒருங்கிணைத்து வைத்திருக்க முடியும் என்ற மதிப்பீடும் நிலவுகிறது.