தேர்தல் பிரசாரம் இன்று மாலை 6 மணிக்கு நிறைவு – வாக்குப்பதிவுக்கு தயாராகுங்கள்

தமிழகம், புதுச்சேரி, கேரளா, அசாம் மற்றும் மேற்கு வங்கம் ஆகிய ஐந்து மாநிலங்களுக்கான சட்டசபை தேர்தலை முன்னிட்டு நடைபெற்றுவரும் தேர்தல் பிரசாரம் இன்று மாலை 6 மணியுடன் முடிவடைகிறது. தமிழகத்தில் உள்ள 234 சட்டசபை தொகுதிகளுக்கும் ஒரே கட்டமாக வரும் 23ஆம் தேதி வாக்குப்பதிவு நடைபெற உள்ளது. இதேபோல், மேற்கு வங்கத்தில் முதல் கட்டமாக 152 தொகுதிகளுக்கு ஏப்ரல் 23ஆம் தேதி தேர்தல் நடைபெறுகிறது. இந்த தேர்தலில் தமிழகத்தில் மொத்தம் 4,023 வேட்பாளர்கள் போட்டியிடுகின்றனர். இதில் 3,579 ஆண்கள், 443 பெண்கள் மற்றும் ஒரு திருநங்கை வேட்பாளர் அடங்குவர். திமுக, அதிமுக, தவேக மற்றும் நாம் தமிழர் கட்சி ஆகியவற்றுக்கிடையில் கடும் நான்கு முனை போட்டி நிலவுகிறது. முதல்வர் மு.க. ஸ்டாலின் கொளத்தூர் தொகுதியில் மீண்டும் போட்டியிடுகிறார். அதிமுக பொதுச்செயலாளர் எடப்பாடி பழனிசாமி இடைப்பாடி தொகுதியில் களம் இறங்கியுள்ளார். தவேக தலைவர் விஜய் மற்றும் நாம் தமிழர் கட்சி ஒருங்கிணைப்பாளர் சீமான் ஆகியோரும் தங்களது தொகுதிகளில் போட்டியிடுகின்றனர். இறுதி கட்ட தேர்தல் பிரசாரத்தில் அரசியல் கட்சி தலைவர்கள் தீவிரமாக ஈடுபட்டு வந்தனர். அதேசமயம், வாக்காளர்களை ஈர்க்க பணம் மற்றும் பொருட்கள் வழங்கப்படுவதாகவும் குற்றச்சாட்டுகள் எழுந்துள்ளன. இந்நிலையில், தேர்தல் கமிஷன் பல கட்டுப்பாடுகளை அறிவித்துள்ளது. இன்று மாலை 6 மணிக்குப் பிறகு எந்தவித தேர்தல் பிரசாரமும் நடத்த அனுமதி இல்லை. சமூக வலைதளங்கள், தொலைக்காட்சி, ரேடியோ போன்றவற்றின் மூலம் தேர்தல் தொடர்பான தகவல்களை பகிரவும் தடை விதிக்கப்பட்டுள்ளது. வாக்குப்பதிவு நாளன்று காலை 7 மணி முதல் மாலை 6 மணி வரை ஓட்டுப்பதிவு நடைபெறும். வாக்குகள் மே 4ஆம் தேதி எண்ணப்பட்டு முடிவுகள் அறிவிக்கப்பட உள்ளன.