எடப்பாடியில் எடப்பாடி கே. பழனிசாமி, சென்னையில் விஜய், சீமான் ஓட்டுப்பதிவு

சட்டசபை தேர்தல் சூழலில் தமிழகம் முழுவதும் வாக்குப்பதிவு உற்சாகமாக நடைபெற்று வருகிறது. சேலம் மாவட்டம் சிலுவம்பாளையத்தில், முன்னாள் முதல்வர் எடப்பாடி கே. பழனிசாமி தனது மனைவி மற்றும் மகனுடன் வந்து எடப்பாடி தொகுதியில் தனது ஓட்டினை பதிவு செய்தார். இது அவர் அதே தொகுதியில் போட்டியிடும் 8வது முறை ஆகும். ஓட்டளித்த பிறகு அவர் நிருபர்களிடம், “அனைத்து வாக்காளர்களும் தவறாமல் ஓட்டுச்சாவடிக்கு வந்து ஜனநாயக கடமையை நிறைவேற்ற வேண்டும். இந்த தேர்தலில் வெற்றி பெறுவோம் என்ற நம்பிக்கை உள்ளது” என்று தெரிவித்தார். இதேபோல், சென்னை நீலாங்கரையில் உள்ள ஓட்டுச்சாவடியில் தமிழக வெற்றிக்கழக தலைவர் விஜய் தனது ஓட்டினை பதிவு செய்து ஜனநாயக கடமையை ஆற்றினார். அதனைத் தொடர்ந்து, அதே பகுதியில் சீமான் ஓட்டளித்தார். அவர் பேசுகையில், வெளிநாடுகளில் வசிக்கும் தமிழர்களுக்கும் தபால் ஓட்டு போன்ற வசதி வழங்க வேண்டும் என்று கோரிக்கை வைத்தார். மேலும், “ஒரு ஓட்டு கூட நாட்டின் மாற்றத்திற்கு காரணமாக இருக்கும். ஓட்டளிக்காமல் இருப்பது ஜனநாயகத்திற்கு எதிரான செயல்” என்று வலியுறுத்தினார். மேலும், மத்திய அமைச்சர் எல். முருகன், பாமக தலைவர் அன்புமணி ராமதாஸ், அமமுக பொதுச்செயலாளர் டி.டி.வி. தினகரன் உள்ளிட்ட பலர் தங்களது வாக்குகளை பதிவு செய்தனர்.