ஹார்முஸ் ஜலசந்தி மீண்டும் திறப்பு: 10 நாட்களுக்கு வணிக கப்பல்களுக்கு அனுமதி – ஈரான் அறிவிப்பு

டெஹ்ரான்: மேற்காசியாவில் நீடித்து வந்த பதற்ற நிலைக்கு இடையில் முக்கிய முன்னேற்றமாக, உலகளாவிய எண்ணெய் வர்த்தகத்திற்கு அத்தியாவசியமான ஹார்முஸ் ஜலசந்தி வழியாக அனைத்து வணிக கப்பல்களும் செல்ல அனுமதி வழங்கப்படுவதாக ஈரான் வெளியுறவு அமைச்சர் அப்பாஸ் அராக்சி அறிவித்துள்ளார். அமெரிக்கா மற்றும் இஸ்ரேல் இணைந்து ஈரான் மீது தாக்குதல் நடத்தியதைத் தொடர்ந்து, ஈரான் பதிலடி தாக்குதல்களை மேற்கொண்டது. இதன் விளைவாக, லெபனானில் செயல்படும் ஹெஸ்பொல்லா அமைப்பும் இஸ்ரேல் மீது தாக்குதல் தொடுக்க, நிலைமை மேலும் மோசமடைந்தது. போர் தீவிரமடைந்த நிலையில், உலக கச்சா எண்ணெய் போக்குவரத்தில் முக்கிய பாதையாக உள்ள ஹார்முஸ் ஜலசந்தி மூடப்பட்டது. இதனால் உலகளவில் எண்ணெய் விலை உயர்வு மற்றும் எரிபொருள் தட்டுப்பாடு ஏற்பட்டது. இந்நிலையில், அமெரிக்க அதிபர் டொனால்டு டிரம்ப் அறிவித்த தற்காலிக போர் நிறுத்தத்திற்குப் பிறகு, லெபனான் – இஸ்ரேல் இடையேயான மோதல் குறைந்தது. இதனைத் தொடர்ந்து, ஹார்முஸ் ஜலசந்தி வழியாக வணிக கப்பல்கள் செல்ல ஈரான் அனுமதி வழங்கியுள்ளது. இந்த அனுமதி அடுத்த 10 நாட்களுக்கு மட்டுமே அமலில் இருக்கும் என்றும், அனைத்து கப்பல்களும் ஈரான் கடல்சார் அமைப்பு அறிவித்த பாதையில் பயணிக்க வேண்டும் என்றும் அறிவுறுத்தப்பட்டுள்ளது. இந்த முடிவு உலக வர்த்தகத்திற்கும் எண்ணெய் சந்தைக்கும் நம்பிக்கை அளிப்பதாக பார்க்கப்படுகிறது. மேலும், சர்வதேச காப்பீட்டு நிறுவனங்கள் கூடுதல் காப்பீடு வழங்க முன்வந்துள்ளதால், கப்பல் போக்குவரத்து மீண்டும் சீராகும் என எதிர்பார்க்கப்படுகிறது.