நாற்காலிக்காக அல்ல, தமிழ்நாட்டுக்காக வந்தேன்: சேலத்தில் கமல் ஹாசன் உரை

சேலம்: திமுக மற்றும் கூட்டணி கட்சிகள் இணைந்து நடத்திய பொதுக்கூட்டத்தில், மநீம தலைவர் மற்றும் ராஜ்யசபா எம்பி கமல் ஹாசன் உரையாற்றினார். அவர் பேசியதாவது: இந்த கூட்டணியை வெறும் தேர்தல் கூட்டணியாக மட்டும் பார்க்கவில்லை; இது ஒரு திராவிட குடும்பமாக நான் பார்க்கிறேன். திராவிடம் நாட்டை முழுவதும் பாதித்த ஒரு சிந்தனை. அதை புரிந்தவர்கள் இங்கே அமர்ந்துள்ளனர். நான் பேச வேண்டிய கருத்துகளை பெரியார், அண்ணாதுரை, கருணாநிதி போன்ற தலைவர்கள் ஏற்கனவே சொல்லி வைத்துள்ளனர். இன்று அரசியலில் நடைபெறும் போலித்தனங்கள் மற்றும் மக்கள் சார்பு இல்லாத செயல்கள் குறித்து பேச வேண்டிய அவசியம் உள்ளது. திமுக ஆட்சி அமைய நான் பிரசாரம் செய்ய மட்டுமல்ல, அநீதிக்கு எதிரான குரலாகவும் வந்துள்ளேன். 33 சதவீத பெண்கள் ஒதுக்கீடு குறித்து தற்போது பேசப்படுவது புதிதல்ல. இது தூண்டிலில் வைக்கப்பட்ட சிறிய மீன் போல. அதை எளிதாக ஏற்க முடியாது; விவாதிக்க வேண்டும். தொகுதி மறுவரையறை மற்றும் பெண்கள் ஒதுக்கீட்டை ஒன்றாக இணைத்து பேசுவது சரியல்ல. இரண்டையும் தனித்தனியாக பார்க்க வேண்டும். தமிழகத்தில் கல்வியறிவு அதிகம் உள்ளது. இதை மற்ற மாநிலங்களுக்கும் எடுத்துச் செல்லும் பொறுப்பு தமிழ்நாட்டுக்கு உள்ளது. திமுக அரசின் நலத்திட்டங்கள் மூலம் பெண்கள் கல்வியில் அதிகமாக சேர்ந்துள்ளனர் என்பது உண்மை. நான் எந்தப் பதவிக்காகவும் வரவில்லை. திராவிட சிந்தனையை முன்னேற்றும் ஒரு வாய்ப்பாக இதை பார்க்கிறேன். தமிழ்நாட்டுக்கு அநீதி நடந்தால் குரல் கொடுக்கும் பொறுப்பு நமக்கு உள்ளது. நான் இளம் வயதில் திமுகவில் சேரவில்லை. ஆனால் இன்று அந்த குடும்பத்தின் ஒரு பகுதியாக இருப்பது உண்மை. கட்சிகள் வேறுபட்டாலும், தமிழ்நாடு நமக்கு பொதுவானது. நாளை நமதே என்பது ஒரு கட்சிக்கு மட்டும் அல்ல; அனைவருக்கும் சேர வேண்டிய ஒன்று என்று அவர் கூறினார்.