நரேந்திர மோடி இன்று கோவையில் பிரசாரம் – தே.ஜ. கூட்டணிக்கு ஆதரவு

சென்னை: தமிழக சட்டசபை தேர்தல் பிரசாரம் இறுதி கட்டத்தை எட்டியுள்ள நிலையில், தேசிய ஜனநாயக கூட்டணி (தே.ஜ.) வேட்பாளர்களை ஆதரித்து இந்திய பிரதமர் நரேந்திர மோடி இன்று (ஏப்ரல் 18) கோவையில் நடைபெறும் பொதுக்கூட்டத்தில் கலந்து கொண்டு உரையாற்றுகிறார். முன்னதாக, கடந்த ஏப்ரல் 15ஆம் தேதி நாகர்கோவிலில் நடைபெற்ற ரோடு ஷோவில் பிரதமர் மோடி பங்கேற்று பிரசாரம் செய்தார். அந்த நிகழ்ச்சியில் அ.தி.மு.க. பொதுச்செயலாளர் எடப்பாடி பழனிசாமி கலந்து கொண்டார். இன்றைய கோவை பொதுக்கூட்டத்தில், கோவை மற்றும் சுற்றியுள்ள மாவட்டங்களில் போட்டியிடும் அ.தி.மு.க. மற்றும் பா.ஜ. வேட்பாளர்களுக்கு ஆதரவு திரட்ட பிரதமர் பேச உள்ளார். இந்த நிகழ்ச்சியில் எடப்பாடி பழனிசாமி உள்ளிட்ட தே.ஜ. கூட்டணி தலைவர்களும் பங்கேற்கின்றனர். மேலும், மத்திய உள்துறை அமைச்சர் அமித் ஷா நாளை ஈரோடு மாவட்டம் மொடக்குறிச்சி தொகுதியில் பா.ஜ. வேட்பாளர் கிருத்திகாவை ஆதரித்து பிரசாரம் செய்கிறார். அதேபோல், சென்னை மயிலாப்பூரில் போட்டியிடும் பா.ஜ. வேட்பாளர் தமிழிசை சௌந்தரராஜன் அவர்களுக்கு ஆதரவாக ரோடு ஷோவும் நடத்த திட்டமிடப்பட்டுள்ளது.