போக்சோ வழக்கில் மதபோதகருக்கு 7 ஆண்டு சிறை | திருநெல்வேலி நீதிமன்ற தீர்ப்பு

திருநெல்வேலி மாவட்டத்தில் சிறுமிக்கு பாலியல் தொல்லை அளித்ததாக தொடரப்பட்ட போக்சோ வழக்கில், கிறிஸ்தவ மதபோதகருக்கு ஏழு ஆண்டுகள் சிறை தண்டனை விதிக்கப்பட்டுள்ளது. வள்ளியூர் அருகே வடக்கன்குளத்தை சேர்ந்த 58 வயதான மதபோதகர் ஒருவர், 2020 ஆம் ஆண்டு நடைபெற்ற ஜெபக்கூட்டத்தில் கலந்து கொண்ட எட்டு வயது சிறுமிக்கு பாலியல் தொல்லை அளித்ததாக குற்றச்சாட்டு எழுந்தது. இதுகுறித்து வள்ளியூர் மகளிர் போலீசார் போக்சோ சட்டத்தின் கீழ் வழக்குப்பதிவு செய்து அவரை கைது செய்தனர். இந்த வழக்கு திருநெல்வேலி போக்சோ சிறப்பு நீதிமன்றத்தில் விசாரிக்கப்பட்டது. வழக்கை பரிசீலித்த நீதிபதி, குற்றம் நிரூபிக்கப்பட்டதைத் தொடர்ந்து ஏழு ஆண்டுகள் சிறை தண்டனையும் ரூ.10,000 அபராதமும் விதித்து தீர்ப்பளித்தார். மேலும், பாதிக்கப்பட்ட சிறுமிக்கு அரசு சார்பில் ரூ.1 லட்சம் நிவாரணத் தொகை வழங்கவும் நீதிமன்றம் உத்தரவிட்டுள்ளது.