ரூ.3000 கோடி வசூல் சாதனை படைத்த ரன்வீர் சிங் ‘துரந்தர்’ படம்

புதுடில்லி: பாலிவுட் நடிகர் ரன்வீர் சிங் நடித்த ‘துரந்தர்’ திரைப்படம் உலகளவில் வசூல் சாதனையை படைத்துள்ளது. இந்த படத்தின் முதல் மற்றும் இரண்டாம் பாகங்கள் இணைந்து ரூ.3,000 கோடி வசூலை கடந்துள்ளன. கடந்த டிசம்பர் மாதம் வெளியான ‘துரந்தர்’ திரைப்படத்தின் முதல் பாகம் ரசிகர்களிடையே மிகப்பெரிய வரவேற்பைப் பெற்றது. இந்திய ராணுவத்தில் பணிபுரியும் உளவாளியின் வாழ்க்கையை மையமாகக் கொண்டு உருவாக்கப்பட்ட இந்த படம், உலகளவில் ரூ.1300 கோடி வசூலை எட்டியது. இதனைத் தொடர்ந்து ‘துரந்தர்: தி ரிவெஞ்ச்’ என்ற பெயரில் இரண்டாம் பாகம் சமீபத்தில் வெளியானது. முதல் பாகத்தை விட அதிகமான திரில்லும், உணர்ச்சியும் கொண்ட இந்த படம் ரசிகர்களை கவர்ந்தது. குறிப்பாக சமகால அரசியல் மற்றும் பாதுகாப்பு சம்பவங்களுடன் இணைக்கப்பட்ட கதை, பார்வையாளர்களை ஆழமாக சிந்திக்க வைத்தது. இரண்டாம் பாகம் எதிர்பார்ப்பை மீறி வெற்றி பெற்றதால், ரசிகர்கள் பலமுறை திரையரங்குகளில் படம் பார்த்தனர். இதன் மூலம் படம் ரூ.1700 கோடிக்கு மேல் வசூல் செய்துள்ளது. இரண்டு பாகங்களும் சேர்த்து தற்போது வரை ரூ.3,019 கோடி வசூல் செய்து இந்திய சினிமா வரலாற்றில் புதிய சாதனையை உருவாக்கியுள்ளது. இதற்கு முன்பு பாகுபலி 1 மற்றும் 2 பாகங்கள் சேர்த்து ரூ.2438 கோடி வசூல் செய்ததே அதிகபட்சமாக இருந்தது என்பது குறிப்பிடத்தக்கது.