தி.மு.க. கூட்டணியில் ம.தி.மு.க. அதிருப்தி: “சிரித்துக் கொண்டே அழுகிறோம்” என வேதனை

சென்னை: தி.மு.க. தலைமையிலான கூட்டணியில் தொகுதி பங்கீடு தொடர்பாக கடும் அதிருப்தி நிலவி வருகிறது. குறிப்பாக ம.தி.மு.க. தங்களுக்கு வழங்கப்பட்ட தொகுதிகள் குறைவாக இருப்பதால் அதிருப்தியை வெளிப்படுத்தியுள்ளது. முன்னதாக ஆறு தொகுதிகள் வழங்கப்பட்ட நிலையில், இம்முறை ம.தி.மு.க.க்கு நான்கு தொகுதிகள் மட்டுமே ஒதுக்கப்பட்டுள்ளது. அதிலும் ஒரு தொகுதியில் மட்டும் தனிச்சின்னத்தில் போட்டியிடவும், மற்ற மூன்று தொகுதிகளில் தி.மு.க. சின்னமான உதயசூரியன் சின்னத்தில் போட்டியிடவும் உடன்பாடு செய்யப்பட்டுள்ளதாக தகவல் வெளியாகியுள்ளது. இதுகுறித்து ம.தி.மு.க. அவைத்தலைவர் அர்ஜுனராஜ் செய்தியாளர்களிடம் கூறுகையில், “சிலர் சிரிப்பார்கள், சிலர் அழுவார்கள்; ஆனால் நாங்கள் சிரித்துக் கொண்டே அழுகிறோம். எங்களின் அரசியல் நிலைக்கு ஏற்ப தொகுதிகள் வழங்கப்படவில்லை” என தெரிவித்தார். இதற்கிடையில், புதிய கூட்டணி கட்சியான தே.மு.தி.க.க்கு 10 தொகுதிகள் மற்றும் ஒரு ராஜ்யசபா இடம் வழங்கப்பட்டுள்ளதும், மற்ற கூட்டணி கட்சிகளான கம்யூனிஸ்ட் கட்சிகள் மற்றும் விடுதலை சிறுத்தைகள் கட்சிக்கும் எதிர்பார்த்ததை விட குறைவான தொகுதிகள் வழங்கப்பட்டுள்ளதும் கூட்டணியில் சிக்கலை அதிகரித்துள்ளது. மேலும், கொங்கு இளைஞர் பேரவை தலைவர் தனியரசு தி.மு.க. கூட்டணியில் தொடர்வாரா என்பது கேள்விக்குறியாகியுள்ளது. அவருக்கு முன்பு ஒரு தொகுதி உறுதி செய்யப்பட்டதாக கூறப்பட்ட நிலையில், தற்போது அதில் மாற்றம் ஏற்பட்டுள்ளதாக தகவல் வெளியாகியுள்ளது. இதனால் அவர் விரைவில் தனது முடிவை அறிவிக்க உள்ளதாக கூறப்படுகிறது.