5 காலியான தொகுதிகளுக்கு இடைத்தேர்தல் அறிவிக்க உயர்நீதிமன்றம் இடைக்கால தடை

தமிழகத்தில் காலியாக உள்ள ஐந்து சட்டசபை தொகுதிகளுக்கு இடைத்தேர்தல் அறிவிப்பதற்கு சென்னை உயர்நீதிமன்றம் இடைக்காலத் தடை விதித்துள்ளது. தேர்தல் வழக்குகள் நிலுவையில் உள்ள நிலையில் இந்த உத்தரவு முக்கியத்துவம் பெற்றுள்ளது. தமிழக சட்டசபைத் தேர்தலில் இரண்டு தொகுதிகளில் வெற்றி பெற்ற தவெக தலைவர் விஜய், பின்னர் திருச்சி கிழக்கு தொகுதி உறுப்பினர் பதவியை ராஜினாமா செய்தார். அதேபோல், கரூர் தொகுதியின் எம்.ஆர். விஜயபாஸ்கர், விராலிமலை தொகுதியின் சி. விஜயபாஸ்கர், பெருந்துறை தொகுதியின் எஸ். ஜெயகுமார் மற்றும் அம்பாசமுத்திரம் தொகுதியின் இசக்கி சுப்பையா ஆகியோரும் தங்கள் பதவிகளை ராஜினாமா செய்தனர். இந்தத் தொகுதிகளின் தேர்தல் முடிவுகளை எதிர்த்து தொடரப்பட்ட வழக்குகள் நிலுவையில் இருக்கும் நிலையில், இடைத்தேர்தல் அறிவிக்கக் கூடாது எனக் கோரி பொது நல மனு தாக்கல் செய்யப்பட்டது. இந்த மனுவை விசாரித்த தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் அமர்வு, அனைத்து தரப்பினரின் வாதங்களையும் கேட்டது. மனுதாரர் தரப்பில், தேர்தல் வழக்குகள் முடிவடையும் முன் இடைத்தேர்தல் நடத்தப்பட்டால், பின்னர் நீதிமன்ற தீர்ப்பால் அரசியல் சாசன சிக்கல்கள் உருவாகலாம் என்றும், ஒரே தொகுதிக்கு இரண்டு மக்கள் பிரதிநிதிகள் என்ற நிலை ஏற்பட வாய்ப்புள்ளதாகவும் வாதிடப்பட்டது. மறுபுறம், தேர்தல் ஆணையம், நிலுவையில் உள்ள தேர்தல் வழக்குகள் குறித்து அதிகாரப்பூர்வ தகவல்கள் இதுவரை கிடைக்கவில்லை என்றும், சட்டரீதியாக மனுதாரரின் வாதம் ஏற்கத்தக்கதல்ல என்றும் தெரிவித்தது. தமிழக அரசு சார்பில், தேர்தல் வழக்குகள் தாக்கல் செய்யப்படுவதற்கு முன்பே சம்பந்தப்பட்ட உறுப்பினர்கள் ராஜினாமா செய்திருந்தனர் என்று விளக்கம் அளிக்கப்பட்டது. முதல்வர் விஜய் தரப்பில், மனுதாரருக்கு இந்த வழக்கை தொடரும் உரிமை இல்லை என்றும், இடைத்தேர்தல் அறிவிப்பது தேர்தல் ஆணையத்தின் அதிகார வரம்புக்குள் வரும் என்றும் வாதிடப்பட்டது. அனைத்து வாதங்களையும் பரிசீலித்த நீதிமன்றம், தேர்தல் வழக்குகள் முடிவடைவதற்கு முன் இடைத்தேர்தல் நடத்துவது தேவையற்ற அரசுச் செலவையும் அரசியல் சாசன சிக்கல்களையும் ஏற்படுத்தக்கூடும் என்று குறிப்பிட்டது. இதையடுத்து, தேர்தல் ஆணையம், மத்திய அரசு, தமிழக சட்டசபை செயலாளர், முதல்வர் விஜய் மற்றும் சம்பந்தப்பட்ட முன்னாள் எம்.எல்.ஏ.க்கள் மூன்று வாரங்களுக்குள் பதிலளிக்க உத்தரவிடப்பட்டுள்ளதுடன், அதுவரை திருச்சி கிழக்கு உள்ளிட்ட ஐந்து தொகுதிகளுக்கு இடைத்தேர்தல் அறிவிக்க இடைக்காலத் தடை விதிக்கப்பட்டுள்ளது.