'உழைத்தவர்களுக்கு அங்கீகாரம் இல்லை' - அதிமுக இளைஞரணி நிர்வாகிகள் ஆதங்கம்

அதிமுக இளைஞரணியின் மாநில மற்றும் மாவட்ட நிர்வாகிகள் ஆலோசனைக் கூட்டத்தில், கட்சிக்காக உழைத்தவர்களுக்கு உரிய அங்கீகாரம் கிடைக்கவில்லை என்ற அதிருப்தி வெளிப்படுத்தப்பட்டதாக தகவல் வெளியாகியுள்ளது. சென்னையில் நடைபெற்ற இந்தக் கூட்டத்திற்கு இளைஞரணி மாநிலச் செயலரும், முன்னாள் எம்.பி.யுமான விஜயகுமார் தலைமை தாங்கினார். கூட்டத்தில் பல்வேறு மாவட்டங்களைச் சேர்ந்த நிர்வாகிகள் கலந்து கொண்டு, தேர்தல் தோல்வி மற்றும் இளைஞரணியின் செயல்பாடு குறித்து கருத்துகளை பகிர்ந்தனர். நிர்வாகிகள் கூறுகையில், கட்சிக்காக நீண்ட காலமாக உழைத்து வரும் நிர்வாகிகளுக்கு போதிய முக்கியத்துவம் வழங்கப்படவில்லை என்றும், பதவி பெற்ற பிறகு வேறு கட்சிகளுக்கு செல்லும் நபர்களுக்கே முன்னுரிமை வழங்கப்படுவதாகவும் குற்றம்சாட்டினர். மேலும், சட்டசபைத் தேர்தலின் போது இளைஞரணிக்கு உரிய பொறுப்புகள் வழங்கப்படவில்லை என்றும், பூத் கமிட்டிகளில்கூட இளைஞரணி உறுப்பினர்கள் போதிய அளவில் இடம்பெறவில்லை என்றும் அவர்கள் தெரிவித்தனர். மாவட்ட செயலர்கள் தங்களுக்கு நெருக்கமானவர்களையே முன்னிலைப்படுத்தியதால், புதிய இளைஞர்களை கட்சிக்குள் கொண்டு வருவதில் சிரமம் ஏற்பட்டதாகவும், இதுவே தேர்தல் தோல்விக்கான காரணங்களில் ஒன்றாக இருந்ததாகவும் அவர்கள் கருத்து தெரிவித்தனர். எனவே, இனிமேல் கட்சிக்கு விசுவாசமாக செயல்படும் நிர்வாகிகளுக்கு உரிய அங்கீகாரமும் பொறுப்புகளும் வழங்கப்பட வேண்டும் என்று கூட்டத்தில் வலியுறுத்தப்பட்டதாக கூறப்படுகிறது. இதற்கு பதிலளித்த விஜயகுமார், நிர்வாகிகளின் கருத்துகளை கட்சித் தலைமையின் கவனத்திற்கு கொண்டு செல்வதாகவும், அதிகளவில் இளைஞர்களை கட்சியில் இணைக்கும் பணிகளை தீவிரப்படுத்த வேண்டும் என்றும் அறிவுறுத்தியதாக தகவல் வெளியாகியுள்ளது. இதற்கிடையில், சட்டசபைத் தேர்தல் தோல்விக்கான காரணங்கள் குறித்து அதிமுக பொதுச்செயலாளர் எடப்பாடி பழனிசாமி மாவட்ட வாரியாக நிர்வாகிகளுடன் ஆலோசனைக் கூட்டங்களை தொடர்ந்து நடத்தி வருகிறார். வரும் நாட்களில் மேலும் பல மாவட்ட நிர்வாகிகளுடன் ஆலோசனை நடத்த திட்டமிடப்பட்டுள்ளது.