'எல் நினோ' தாக்கத்துக்கு மத்திய அரசு முழு தயார்: வறட்சி அபாய மாநிலங்களில் தீவிர கண்காணிப்பு

'எல் நினோ' பருவநிலை தாக்கத்தால் தென்மேற்கு பருவமழை குறையக்கூடும் என்ற எச்சரிக்கையைத் தொடர்ந்து, மழைப்பொழிவு, சாகுபடி நிலவரம் மற்றும் விவசாய நடவடிக்கைகளை மத்திய அரசு தீவிரமாக கண்காணித்து வருகிறது. மத்திய வேளாண் அமைச்சர் சிவ்ராஜ் சிங் சவுகான், புதுடெல்லியில் அதிகாரிகளுடன் ஆலோசனை நடத்திய பின்னர், வறட்சி அபாயத்தை எதிர்கொள்ள தேவையான அனைத்து முன்னெச்சரிக்கை நடவடிக்கைகளும் மேற்கொள்ளப்பட்டுள்ளதாக தெரிவித்தார். அவரின் தகவலின்படி, நடப்பு காரிப் பருவத்தில் இதுவரை 8.64 கோடி ஏக்கர் பரப்பளவில் மட்டுமே சாகுபடி நடைபெற்றுள்ளது. இது கடந்த ஆண்டின் இதே காலத்தை ஒப்பிடும்போது 2.27 கோடி ஏக்கர் குறைவாகும். பருவமழை தாமதமானதால் குறிப்பாக சோயாபீன் மற்றும் பருத்தி சாகுபடி பாதிக்கப்பட்டுள்ளது. இதையடுத்து, குறைந்த தண்ணீரில் வளரும் மக்காச்சோளம், கம்பு, பாசிப்பயிறு உள்ளிட்ட பயிர்களை அதிகம் சாகுபடி செய்ய விவசாயிகளுக்கு மத்திய அரசு பரிந்துரைத்துள்ளது. ஜூன் மாதத்தில் 33 சதவீதமாக இருந்த மழைப்பற்றாக்குறை, ஜூலை மாத மழையால் தற்போது 24 சதவீதமாக குறைந்துள்ளதாகவும், மழை குறைவாக பதிவான மாவட்டங்களின் எண்ணிக்கை 262-இல் இருந்து 178 ஆக குறைந்துள்ளதாகவும் தெரிவிக்கப்பட்டது. மஹாராஷ்டிரா, மத்திய பிரதேசம், குஜராத், ஆந்திரப் பிரதேசம், கர்நாடகா, தெலுங்கானா உள்ளிட்ட 13 மாநிலங்களுக்கு மாவட்ட அளவிலான அவசரகால செயல் திட்டங்கள் அனுப்பப்பட்டுள்ளன. மேலும், விதைத் தட்டுப்பாடு ஏற்படாமல் இருக்க நாடு முழுவதும் 1.75 லட்சம் குவின்டால் விதைகள் கையிருப்பில் வைக்கப்பட்டுள்ளன. பயிர் சேதம் ஏற்பட்டால் விவசாயிகளுக்கு நிதி பாதுகாப்பு கிடைக்க பிரதமரின் பயிர் காப்பீட்டு திட்டத்தில் அதிக விவசாயிகளை இணைக்கும் நடவடிக்கைகளும் வேகப்படுத்தப்பட்டுள்ளன. அதேபோல், விவசாயக் கடன் வழங்கும் பணிகளும் விரைவுபடுத்தப்பட்டுள்ளன. பருவமழை மிகவும் குறைந்தால் கால்நடைகளுக்கு தீவன பற்றாக்குறை ஏற்படலாம் என்பதால், தேவையான இடங்களுக்கு தீவனத்தை முன்கூட்டியே கொண்டு செல்லும் திட்டமும் தயாராக இருப்பதாக மத்திய அரசு தெரிவித்துள்ளது. 'எல் நினோ' என்றால் என்ன? மத்திய மற்றும் கிழக்கு பசிபிக் பெருங்கடலில் கடல் மேற்பரப்பு நீரின் வெப்பநிலை இயல்பை விட அதிகரிக்கும் இயற்கை பருவநிலை நிகழ்வே 'எல் நினோ' ஆகும். இது உலகளாவிய மழைப்பொழிவு, வெப்பநிலை மற்றும் காற்றோட்ட முறைகளில் மாற்றத்தை ஏற்படுத்துகிறது. இந்தியாவில் இது பொதுவாக பருவமழை குறைவு, வறட்சி மற்றும் அதிக வெப்பநிலைக்கு காரணமாக அமைகிறது.