அமர்நாத் யாத்திரையில் பக்தர்கள் வருகை அதிகரிப்பு; 5 நாட்களில் 1.13 லட்சம் தரிசனம்

ஜம்மு-காஷ்மீரில் நடைபெற்று வரும் அமர்நாத் யாத்திரையில் இந்த ஆண்டு பக்தர்களின் வருகை குறிப்பிடத்தக்க அளவில் உயர்ந்துள்ளது. யாத்திரை தொடங்கிய முதல் ஐந்து நாட்களிலேயே 1.13 லட்சத்திற்கும் அதிகமானோர் புனித பனிலிங்கத்தை தரிசித்து புதிய மைல்கல்லை எட்டியுள்ளனர். அனந்த்நாக் மாவட்டத்தின் பஹல்காம் பகுதியில், கடல் மட்டத்திலிருந்து சுமார் 12,730 அடி உயரத்தில் அமைந்துள்ள அமர்நாத் குகைக் கோவிலில் இயற்கையாக உருவாகும் பனிலிங்கத்தை தரிசிக்க ஆண்டுதோறும் லட்சக்கணக்கான பக்தர்கள் வருகை தருகின்றனர். இந்தாண்டு யாத்திரை ஜூலை 3ஆம் தேதி தொடங்கி, ஆகஸ்ட் 28ஆம் தேதி வரை நடைபெறுகிறது. பக்தர்களின் பாதுகாப்பு, போக்குவரத்து, மருத்துவ வசதி மற்றும் சீரான தரிசன ஏற்பாடுகள் விரிவாக செய்யப்பட்டுள்ளதாக நிர்வாகம் தெரிவித்துள்ளது. ஜம்மு-காஷ்மீர் துணைநிலை ஆளுநர் மனோஜ் சின்ஹா, பக்தர்கள் பாதுகாப்பாகவும் சிரமமின்றியும் தரிசனம் செய்ய அனைத்து துறைகளும் ஒருங்கிணைந்து பணியாற்றி வருவதாக கூறினார். யாத்திரையை பக்தர்களுக்கு மறக்க முடியாத ஆன்மிக அனுபவமாக மாற்றுவதே நிர்வாகத்தின் முக்கிய நோக்கம் என்றும் அவர் தெரிவித்துள்ளார்.