உதவி பேராசிரியர் தேர்வில் புதிய சர்ச்சை: அடுத்தடுத்த பதிவு எண்களுக்கு ஒரே மதிப்பெண்?

தமிழக ஆசிரியர் தேர்வு வாரியம் (TRB) வெளியிட்ட உதவி பேராசிரியர் தேர்வு முடிவுகள் தொடர்பாக புதிய சர்ச்சை எழுந்துள்ளது. அடுத்தடுத்த பதிவு எண்களைக் கொண்ட தேர்வர்களுக்கு ஒரே மாதிரியான மதிப்பெண்கள் வழங்கப்பட்டுள்ளதாக தேர்வர்கள் குற்றம்சாட்டியுள்ளனர். ஏற்கனவே, முதல் தாளில் அதிக மதிப்பெண் பெற்ற சிலருக்கு இரண்டாம் தாளில் பூஜ்யம் மதிப்பெண் வழங்கப்பட்டதாகவும், குறைந்த மதிப்பெண் பெற்ற சிலருக்கு அதிக மதிப்பெண்கள் வழங்கப்பட்டதாகவும் புகார்கள் எழுந்திருந்தன. தற்போது, சமூகப் பணி பாடப்பிரிவுக்கான உதவி பேராசிரியர் தேர்வு முடிவுகளை ஆய்வு செய்த தேர்வர்கள், தேர்ச்சி பெற்றவர்கள் மட்டுமின்றி, தேர்ச்சி பெறாதவர்களின் அடுத்தடுத்த பதிவு எண்களுக்கும் ஒரே மாதிரியான மதிப்பெண்கள் வழங்கப்பட்டிருப்பதாக தெரிவித்துள்ளனர். மேலும், முதல் தாளில் ஒரே மதிப்பெண் பெற்ற சிலருக்கு இரண்டாம் தாளிலும் அதேபோன்ற மதிப்பெண்கள் வழங்கப்பட்டிருப்பது சந்தேகத்தை ஏற்படுத்தியுள்ளதாக அவர்கள் கூறுகின்றனர். ஒவ்வொரு விடைத்தாளும் தனித்தனியாக மதிப்பீடு செய்யப்பட்டிருந்தால், இவ்வாறு தொடர்ச்சியாக ஒரே மாதிரியான மதிப்பெண்கள் வருவது இயல்பானதாக இருக்காது என்றும், இரண்டாம் தாள் மதிப்பீடு முறையாக மேற்கொள்ளப்பட்டதா என்பது குறித்து கேள்வி எழுப்பியுள்ளனர். 42 ஆயிரத்திற்கும் மேற்பட்டோர் எழுதிய இந்தத் தேர்வின் விடைத்தாள் மதிப்பீட்டு நடைமுறை மற்றும் மதிப்பெண் வழங்கும் செயல்முறை குறித்து சுயாதீனமாகவும் முழுமையாகவும் விசாரணை நடத்த வேண்டும் என்று தேர்வர்கள் கோரிக்கை விடுத்துள்ளனர்.