அதிமுக எம்.எல்.ஏ., ராஜினாமா சர்ச்சை | சபாநாயகர் முடிவுக்கு எதிர்ப்பு

சென்னை தலைமை செயலகத்தில் சபாநாயகர் பிரபாகரை சந்தித்த பழனிசாமி தரப்பு அ.தி.மு.க., எம்.எல்.ஏ.,க்கள், ராஜினாமா செய்த உறுப்பினர்களின் கடிதங்களை ஏற்கக் கூடாது என மனு அளித்தனர். இதுகுறித்து பேசிய ‘அக்ரி’ கிருஷ்ணமூர்த்தி, “ராஜினாமா கடிதம் கொடுத்த சில நிமிடங்களிலேயே த.வெ.க., உறுப்பினர் அடையாள அட்டைகள் வழங்கப்பட்டுள்ளன. இது தலைமை செயலகமா அல்லது கட்சி அலுவலகமா என்ற கேள்வி எழுகிறது” என்றார். மேலும், “தூய்மையான ஆட்சி தருவோம் என்று கூறிய அரசு தற்போது குதிரை பேரத்தை ஊக்குவிக்கிறது” என்றும் குற்றம்சாட்டினார். தங்கள் தவறை உணர்ந்த ஐந்து எம்.எல்.ஏ.,க்கள் மன்னிப்பு கடிதம் அளித்துள்ளதாகவும், அவர்களின் ஆதரவு வாபஸ் பெறப்பட்டுள்ளதாகவும் தெரிவித்தார். அதேபோல், அ.தி.மு.க., வழக்கறிஞர் பிரிவு செயலரும், ராஜ்யசபா எம்.பி.,யுமான இன்பதுரை, “கட்சி தாவல் தடை சட்டப்படி நடவடிக்கை எடுக்க வேண்டிய நிலையில், ராஜினாமாவை ஏற்றது தவறானது” என்று விமர்சித்தார். சபாநாயகர் முடிவை திரும்ப பெறவில்லை என்றால் நீதிமன்றத்தை அணுகுவோம் என்றும் அவர் எச்சரிக்கை விடுத்தார்.