போதைப்பொருள் ஒழிப்பில் தென் மாநிலங்கள் இணைப்பு; 'ஆப்பரேஷன் துபான்' திட்டம் விரிவாக்கம்

போதைப்பொருள் கடத்தல் மற்றும் பயன்பாட்டை கட்டுப்படுத்தும் நோக்கில், கேரளா முன்னெடுத்துள்ள 'ஆப்பரேஷன் துபான்' திட்டத்தை தென் மாநிலங்கள் இணைந்து செயல்படுத்த முடிவு செய்துள்ளன. இதற்காக கேரளா, தமிழ்நாடு, கர்நாடகா, ஆந்திரப் பிரதேசம், தெலுங்கானா மற்றும் புதுச்சேரி இடையே நிரந்தர ஒருங்கிணைப்பு அமைப்பு உருவாக்கப்பட உள்ளது. கேரளாவில் பள்ளி, கல்லூரி மாணவர்களிடையே அதிகரித்து வந்த போதைப்பொருள் பயன்பாட்டை தடுக்கும் நோக்கில் கடந்த மாதம் 'ஆப்பரேஷன் துபான் – தி நார்கோ ஹன்ட்' திட்டம் தொடங்கப்பட்டது. இந்த நடவடிக்கையின் மூலம் நடத்தப்பட்ட சோதனைகளில் 200-க்கும் மேற்பட்டோர் கைது செய்யப்பட்டதுடன், கணிசமான அளவில் போதைப்பொருட்களும் பறிமுதல் செய்யப்பட்டன. இதனைத் தொடர்ந்து, திருவனந்தபுரத்தில் நடைபெற்ற தென் மாநில போலீஸ் உயரதிகாரிகள் கூட்டத்தில், மாநிலங்களுக்கு இடையேயான தகவல் பரிமாற்றம் மற்றும் கூட்டு நடவடிக்கைகளை வலுப்படுத்துவது குறித்து முக்கிய முடிவுகள் எடுக்கப்பட்டன. ஒவ்வொரு மாநிலத்திலும் எஸ்.பி. அல்லது அதற்கு மேற்பட்ட அதிகாரி ஒருங்கிணைப்பு அதிகாரியாக நியமிக்கப்பட உள்ளார். மேலும், போதைப்பொருள் கட்டுப்பாட்டு பிரிவு, வருவாய் புலனாய்வு இயக்குநரகம், சுங்கத்துறை மற்றும் ரயில்வே பாதுகாப்புப் படை உள்ளிட்ட மத்திய அமைப்புகளும் இந்த ஒருங்கிணைப்பு நடவடிக்கையில் பங்கேற்க உள்ளன. போதைப்பொருள் கடத்தலுக்குப் பயன்படுத்தப்படும் முக்கிய வழித்தடங்கள், மாநில எல்லைகள், பேருந்து மற்றும் ரயில் நிலையங்கள், விமான நிலையங்கள் ஆகியவற்றில் கண்காணிப்பு தீவிரப்படுத்தப்படும். அதேபோல், ஆன்லைன் தளங்கள், கூரியர் சேவைகள் மற்றும் 'டிராப் டெலிவரி' முறைகள் வழியாக நடைபெறும் சட்டவிரோத கடத்தலையும் தடுக்க சிறப்பு நடவடிக்கைகள் மேற்கொள்ளப்படவுள்ளன. மேலும், மருந்தகங்கள் மூலம் தவறாக பயன்படுத்தப்படும் மருந்துகளை கண்காணிக்க சுகாதாரத்துறை மற்றும் காவல்துறை இணைந்து செயல்பட திட்டமிடப்பட்டுள்ளது. கேரளாவில் போதைப்பொருள் தடுப்பு பிரிவுகள் வலுப்படுத்தப்படுவதுடன், வழக்குகளை விரைவாக விசாரிக்க கூடுதல் சிறப்பு நீதிமன்றங்களும் அமைக்கப்பட உள்ளன.