சென்னையில் மீண்டும் பைக் ரேஸ் அட்டகாசம்: சாலை தடுப்பை இழுத்துச் சென்ற இளைஞர்கள்

சென்னையில் ஆபத்தான பைக் ரேஸ் மற்றும் வீலிங் சாகசங்கள் மீண்டும் அதிகரித்து வரும் நிலையில், சாலை பாதுகாப்புக்காக வைக்கப்பட்டிருந்த இரும்பு தடுப்பை இழுத்துச் சென்ற இளைஞர்களின் அட்டூழியம் பொதுமக்களிடையே அதிர்ச்சியை ஏற்படுத்தியுள்ளது. வார இறுதி நாட்களில் அண்ணா சாலை, பூந்தமல்லி நெடுஞ்சாலை, மவுண்ட்–பூந்தமல்லி சாலை, சர்தார் வல்லபபாய் படேல் சாலை, இ.சி.ஆர். மற்றும் ஓ.எம்.ஆர். உள்ளிட்ட முக்கிய சாலைகளில் அதிகாலை மற்றும் இரவு நேரங்களில் பைக் ரேஸ், வீலிங் உள்ளிட்ட ஆபத்தான சாகசங்களில் இளைஞர்கள் ஈடுபட்டு வருவதாக போலீசார் தெரிவித்துள்ளனர். அடையாறு மற்றும் பெசன்ட் நகர் பகுதிகளில், ஐந்துக்கும் மேற்பட்ட மோட்டார் சைக்கிள்களில் வந்த இளைஞர்கள் வேகப் பந்தயத்தில் ஈடுபட்டதுடன், தீப்பொறி பறக்கும்படி வீலிங் செய்து சாகசம் காட்டினர். மேலும், சாலையில் பாதுகாப்புக்காக வைக்கப்பட்டிருந்த 'பேரிகேட்' இரும்புத் தடுப்பை இழுத்துச் சென்று பொதுமக்களுக்கு அச்சுறுத்தலை ஏற்படுத்தியதாக கூறப்படுகிறது. இந்த சம்பவத்தை வீடியோவாக பதிவு செய்து சமூக வலைதளங்களில் வெளியிட்டதைத் தொடர்ந்து, சாஸ்திரி நகர் மற்றும் அடையாறு போலீசார் வழக்குப் பதிவு செய்து, சிசிடிவி காட்சிகளின் அடிப்படையில் சம்பந்தப்பட்டவர்களை தேடி வருகின்றனர். போலீசார் வெளியிட்டுள்ள எச்சரிக்கையில், பைக் ரேஸில் ஈடுபடுவோரின் வாகனங்கள் பறிமுதல் செய்யப்படுவதுடன், ஓட்டுநர் உரிமம் ரத்து, அபராதம் மற்றும் குற்றவழக்கு உள்ளிட்ட கடுமையான நடவடிக்கைகள் எடுக்கப்படும் என தெரிவிக்கப்பட்டுள்ளது. மேலும், இந்த சம்பவத்தில் தொடர்புடையவர்களில் மூன்று பேர் சிறுவர்கள் என தெரியவந்துள்ளதாகவும், அவர்களின் பெற்றோர்களுக்கு எதிராகவும் சட்ட நடவடிக்கை எடுக்கப்படும் என்றும் போலீசார் எச்சரித்துள்ளனர்.