முதல்வர் விஜய் தலைமையிலான அரசின் முதல் சட்டசபை கூட்டம் இன்று: கவர்னர் உரையுடன் தொடக்கம்

தமிழக வெற்றிக் கழகம் 108 தொகுதிகளில் வெற்றி பெற்று ஆட்சி அமைத்ததைத் தொடர்ந்து, முதல்வர் விஜய் தலைமையிலான அரசின் முதல் சட்டசபை கூட்டத்தொடர் இன்று கவர்னர் உரையுடன் தொடங்குகிறது. மே 10-ஆம் தேதி முதல்வராக விஜய் பதவியேற்ற நிலையில், அடுத்த நாளே எம்.எல்.ஏ.க்கள் பதவியேற்றனர். பின்னர் சபாநாயகராக பிரபாகர் போட்டியின்றி தேர்வு செய்யப்பட்டார். பெரும்பான்மை நிரூபிப்பு வாக்கெடுப்பில், எதிர்பாராத வகையில் அ.தி.மு.க.வைச் சேர்ந்த 25 எம்.எல்.ஏ.க்கள் த.வெ.க. அரசுக்கு ஆதரவாக வாக்களித்தனர். இதற்கிடையில், ஐந்து அ.தி.மு.க. எம்.எல்.ஏ.க்கள் மற்றும் திருச்சி கிழக்கு தொகுதி எம்.எல்.ஏ.வாக இருந்த முதல்வர் விஜய் உள்ளிட்ட மொத்தம் ஆறு உறுப்பினர்களின் பதவிகள் காலியாகியுள்ளன. காங்கிரஸ், வி.சி.க. மற்றும் இந்திய யூனியன் முஸ்லிம் லீக் ஆகிய கட்சிகள் அமைச்சரவையில் இடம்பெற்றுள்ளன. இரண்டு கம்யூனிஸ்ட் கட்சிகள் வெளியிலிருந்து ஆதரவு அளித்து வருகின்றன. மொத்தம் 34 அமைச்சர்களைக் கொண்ட கூட்டணி அரசின் முதல் சட்டசபை அமர்வு இன்று நடைபெறுகிறது. கவர்னர் ராஜேந்திர அர்லேக்கர் இன்று காலை 10 மணிக்கு சட்டசபையில் உரையாற்ற உள்ளார். இதற்கான உரை தமிழக அரசால் தயாரிக்கப்பட்டு அனுப்பி வைக்கப்பட்டுள்ளது. புதிய அமைச்சர்கள் மற்றும் ஆளுங்கட்சி எம்.எல்.ஏ.க்களுக்கு சட்டசபை செயல்பாடுகள், எதிர்க்கட்சிகளின் கேள்விகளுக்கு பதிலளிக்கும் நடைமுறைகள் உள்ளிட்டவை குறித்து இரண்டு நாள் பயிற்சி வகுப்புகள் நடத்தப்பட்டுள்ளன. கவர்னர் உரைக்கு நன்றி தெரிவிக்கும் விவாதத்தின்போது, சட்டம்-ஒழுங்கு உள்ளிட்ட பல்வேறு பிரச்னைகளை எதிர்க்கட்சிகள் எழுப்ப வாய்ப்புள்ளதால், அமைச்சர்களின் பதில்கள் மீது அரசியல் வட்டாரங்களில் எதிர்பார்ப்பு அதிகரித்துள்ளது.