ஏமன் கடற்கரை தாக்குதல்: 13 இந்திய மாலுமிகள் பாதுகாப்பாக மீட்பு

ஏமன் கடற்கரைக்கு அருகிலுள்ள செங்கடல் பகுதியில் இந்திய சரக்குக் கப்பல் எம்.எஸ்.வி. பைஸ் நூரே ஓலியா மீது நடத்தப்பட்ட தாக்குதலை இந்திய அரசு கடுமையாக கண்டித்துள்ளது. இந்த சம்பவத்தில் கப்பலில் இருந்த 13 இந்திய மாலுமிகளும் பாதுகாப்பாக மீட்கப்பட்டுள்ளதாக மத்திய வெளியுறவுத்துறை தெரிவித்துள்ளது. வெளியுறவுத்துறை செய்தித் தொடர்பாளர் ரந்தீர் ஜெய்ஸ்வால் வெளியிட்ட தகவலின்படி, ரியாத்தில் உள்ள இந்திய தூதரகம் நிலைமையை தொடர்ந்து கண்காணித்து வருகிறது. மேலும், மாலுமிகளின் பாதுகாப்பை உறுதி செய்வதற்காக ஏமன் அதிகாரிகளுடன் இணைந்து செயல்பட்டு வருவதாகவும் தெரிவித்தார். இந்திய மாலுமிகளை பாதுகாப்பாக மீட்க உதவிய ஏமன் அதிகாரிகளுக்கு இந்திய அரசு நன்றி தெரிவித்துள்ளது. செங்கடல் பகுதியில் வர்த்தகக் கப்பல்கள் மீது தொடர்ச்சியாக நடைபெறும் தாக்குதல்கள் கவலைக்குரியவை என்றும், சர்வதேச கடல் வர்த்தக வழித்தடங்களில் பாதுகாப்பான மற்றும் தடையற்ற கப்பல் போக்குவரத்தை உறுதி செய்ய உலக நாடுகள் நடவடிக்கை எடுக்க வேண்டும் என்றும் இந்தியா வலியுறுத்தியுள்ளது.