சுதந்திரம் என்பது விருப்பம்போல் செயல்படுவது அல்ல: அஜித் தோவல் பேச்சு

மகாராஷ்டிர மாநிலம் புனேவில் நடைபெற்ற விழாவில் தேசிய பாதுகாப்பு ஆலோசகர் அஜித் தோவலுக்கு லோகமான்ய திலக் தேசிய விருது வழங்கப்பட்டது. மத்திய உள்துறை அமைச்சர் அமித் ஷா விருதை வழங்கிய பின்னர் பேசிய அஜித் தோவல், சுதந்திரத்தின் உண்மையான அர்த்தத்தை இளைஞர்கள் புரிந்துகொள்ள வேண்டிய அவசியத்தை வலியுறுத்தினார். அவர் பேசுகையில், இன்றைய தலைமுறையினர் இந்தியா எப்போதும் தற்போதைய நிலைபோலவே இருந்ததாக நினைக்கக்கூடும் என்றும், தாங்கள் நினைப்பதையெல்லாம் செய்வதே சுதந்திரம் என்ற தவறான புரிதல் சிலரிடம் இருப்பதாகவும் குறிப்பிட்டார். உண்மையான சுதந்திரம் என்பது பொறுப்புணர்வு, தியாகம் மற்றும் நாட்டின் நலனுக்கான அர்ப்பணிப்புடன் இணைந்தது என்றும், இந்திய சுதந்திரத்திற்காக போராடிய தலைவர்களின் தியாகங்களை மறக்கக் கூடாது என்றும் அவர் கூறினார். லோகமான்ய பால கங்காதர் திலக் சுதந்திரப் போராட்டத்தின் முக்கிய முன்னோடிகளில் ஒருவராக விளங்கியவர் என்றும், குரல் கொடுக்கவே மக்கள் அஞ்சிய காலத்தில் துணிச்சலுடன் நாட்டின் விடுதலைக்காக போராடிய தலைவர் என்றும் அஜித் தோவல் புகழாரம் சூட்டினார். இளைஞர்கள் திலகரின் சிந்தனைகள், தொலைநோக்கு பார்வை மற்றும் தேசப்பற்றை முன்மாதிரியாகக் கொண்டு செயல்பட வேண்டும் என்றும் அவர் அழைப்பு விடுத்தார்.