தேர்தல் காலத்தில் கோவில் திருவிழாக்களுக்கு கட்டுப்பாடுகள்? ஹிந்து முன்னணி எதிர்ப்பு

சென்னை: தேர்தலை காரணமாகக் கொண்டு கோவில் திருவிழாக்களுக்கு விதிக்கப்படும் கட்டுப்பாடுகள் குறித்து ஹிந்து முன்னணி கடும் எதிர்ப்பை வெளியிட்டுள்ளது. தமிழகத்தில் சட்டசபை தேர்தல் நெருங்கி வருவதையடுத்து, தேர்தல் ஆணையம் பல்வேறு கட்டுப்பாடுகளை அமல்படுத்தி வருகிறது. பொதுக்கூட்டங்கள், மக்கள் திரள் கூடும் நிகழ்ச்சிகள் உள்ளிட்டவற்றிற்கு குறிப்பிட்ட விதிமுறைகள் அறிவிக்கப்பட்டுள்ளன. இந்த நிலையில், சில பகுதிகளில் கோவில் திருவிழாக்கள் இரவு 10 மணிக்குப் பிறகு நடத்தப்பட கூடாது என தேர்தல் அதிகாரிகள் கட்டுப்பாடு விதித்துள்ளதாக கூறப்படுகிறது. இதனால் பக்தர்கள் சிரமத்திற்கு உள்ளாகி வருவதாகவும், பாரம்பரிய நிகழ்ச்சிகள் பாதிக்கப்படுவதாகவும் குற்றச்சாட்டு எழுந்துள்ளது. ஹிந்து முன்னணி மாநில நிர்வாகம் கூறுகையில், “தேர்தல் என்பது ஐந்து ஆண்டுகளுக்கு ஒருமுறை நடைபெறும் நிகழ்வு. ஆனால் கோவில் திருவிழாக்கள் ஆண்டுதோறும் நடைபெறும் பாரம்பரிய விழாக்கள். எனவே இரண்டையும் ஒன்றாக பார்க்கக் கூடாது” என தெரிவித்துள்ளது. மேலும், மத சார்ந்த நிகழ்வுகளுக்கு தேவையற்ற கட்டுப்பாடுகள் விதிக்காமல், தேர்தல் அதிகாரிகள் தனித்தனியாக அணுக வேண்டும் எனவும் வலியுறுத்தப்பட்டுள்ளது. இதுகுறித்து தேர்தல் ஆணையத்துக்கு மனு அளிக்கப்பட்டுள்ளதாக தகவல் வெளியாகியுள்ளது.