ஈரான் எச்சரிக்கை: “ஒவ்வொரு ரத்தத் துளிக்கும் பழி” – இஸ்ரேல் தாக்குதலுக்கு கடும் பதில்

டெஹ்ரான்: இஸ்ரேல் தாக்குதலில் முக்கிய அரசியல் தலைவரான அலி லாரிஜானி உயிரிழந்ததை தொடர்ந்து, ஈரான் கடும் எச்சரிக்கை விடுத்துள்ளது. ஈரானின் புதிய ஆட்சியாளர் அயதுல்லா மொஜ்தபா கமேனி, “சிந்திய ஒவ்வொரு ரத்தத் துளிக்கும் உரிய பழிவாங்கல் இருக்கும்” என்று சமூக வலைதளத்தில் தெரிவித்தார். இந்த தாக்குதலுக்கு பொறுப்பானவர்கள் விரைவில் அதன் விளைவுகளை சந்திக்க நேரிடும் என்றும் அவர் கூறினார். கடந்த 20 நாட்களாக ஈரான் மற்றும் அமெரிக்கா-இஸ்ரேல் கூட்டுப்படைகள் இடையே பதற்றம் அதிகரித்து வருகிறது. இந்நிலையில், ஈரானின் முக்கிய தலைவர்களை குறிவைத்து இஸ்ரேல் தொடர்ந்து தாக்குதல் நடத்தி வருகிறது. 67 வயதான அலி லாரிஜானி, ஈரானின் முன்னணி அரசியல் நபர்களில் ஒருவராக கருதப்பட்டவர். அவரது மரணம் நாட்டில் பெரும் அதிர்ச்சியை ஏற்படுத்தியுள்ளது. இதற்கிடையில், உளவுத்துறை அமைச்சர் இஸ்மாயில் கதிப் உள்ளிட்ட பலர் தாக்குதலில் உயிரிழந்ததாக ஈரான் அதிபர் மசூத் பெஷெஷ்கியான் உறுதிப்படுத்தினார். இந்த தாக்குதலை அவர் “கோழைத்தனமான படுகொலை” என்று கடுமையாக கண்டித்தார். மேலும் உயிரிழந்த தலைவர்களின் குடும்பங்களுக்கு ஆழ்ந்த இரங்கலும் அவர் தெரிவித்துள்ளார்.