ஈரான் மீது மீண்டும் தாக்குதலா? அமெரிக்கா அடுத்தகட்ட திட்டம்

மத்திய கிழக்கில் மீண்டும் போர் பதற்றம் அதிகரிக்கும் சூழல் உருவாகியுள்ளது. ஈரானுடனான பேச்சுவார்த்தை தோல்வியடைந்தால், புதிய ராணுவ நடவடிக்கையை மேற்கொள்ள அமெரிக்கா தீவிரமாக பரிசீலித்து வருவதாக தகவல்கள் வெளியாகியுள்ளன. அமெரிக்கா மற்றும் ஈரான் இடையிலான மோதல் தற்காலிக போர் நிறுத்தத்தால் ஓரளவு கட்டுப்பாட்டுக்குள் வந்திருந்தாலும், நிரந்தர தீர்வு காண்பதற்கான பேச்சுவார்த்தைகள் முன்னேற்றமின்றி நீடித்து வருகின்றன. அமெரிக்க அதிபர் Donald Trump தேசிய பாதுகாப்பு குழுவுடன் நடத்திய ஆலோசனையில், ஈரானுடனான பேச்சு தோல்வியுற்றால் எடுக்கக்கூடிய பல்வேறு ராணுவ நடவடிக்கைகள் குறித்து விவாதிக்கப்பட்டதாக கூறப்படுகிறது. சமீபத்தில் Benjamin Netanyahu உடனான உரையாடலில், ஈரானுக்கு மேலும் பேச்சுவார்த்தை வாய்ப்பு அளிக்க விரும்புவதாக டிரம்ப் கூறியிருந்தாலும், தற்போது அவரது நிலைப்பாட்டில் மாற்றம் ஏற்பட்டுள்ளதாக தகவல்கள் தெரிவிக்கின்றன. ஈரான் மீது மிகப்பெரிய ராணுவ நடவடிக்கையை மேற்கொண்டு, அதன் மூலம் மோதலை விரைவாக முடிவுக்குக் கொண்டு வருவது குறித்து அமெரிக்கா தீவிரமாக ஆலோசித்து வருவதாக சர்வதேச ஊடகங்கள் குறிப்பிட்டுள்ளன. இதற்கிடையே, மத்திய கிழக்கில் பதற்றத்தை குறைக்கும் முயற்சியாக பாகிஸ்தான் ராணுவ தலைமை தளபதி Asim Munir, ஈரான் தலைநகர் டெஹ்ரானில் பேச்சுவார்த்தை நடத்தியதாகவும் தகவல் வெளியாகியுள்ளது. போர் மீண்டும் வெடித்தால், உலகளவில் கச்சா எண்ணெய் விலை, எரிசக்தி விநியோகம் மற்றும் சர்வதேச வர்த்தகத்தில் பெரிய தாக்கம் ஏற்படும் என்ற அச்சம் நிலவுகிறது.