காமன்வெல்த் 2026: பாரா தடகளத்தில் திலீப் காவிட் தங்கம்; இந்தியா 12 பதக்கங்களுடன் முன்னேற்றம்

ஸ்காட்லாந்தின் கிளாஸ்கோவில் நடைபெற்று வரும் 2026 காமன்வெல்த் விளையாட்டுப் போட்டியில் இந்தியா பதக்க வேட்டையை தொடர்ந்து வருகிறது. பாரா தடகளத்தின் 100 மீட்டர் ஓட்டப்பந்தயத்தில் இந்திய வீரர் திலீப் காவிட் தங்கப்பதக்கம் வென்று அசத்தினார். அதே போட்டியில் இந்தியாவின் முகமது பாசில் வெள்ளிப்பதக்கம் கைப்பற்றி இந்தியாவுக்கு இரட்டை மகிழ்ச்சி அளித்தார். நீளம் தாண்டுதல் போட்டியில் இந்தியாவின் முரளி ஸ்ரீசங்கர் வெள்ளிப்பதக்கம் வென்று அணியின் பதக்க எண்ணிக்கையை உயர்த்தினார். இதுவரை இந்தியா 2 தங்கம், 7 வெள்ளி, 3 வெண்கலம் என மொத்தம் 12 பதக்கங்கள் வென்றுள்ளது. பதக்கப்பட்டியலில் இந்தியா தற்போது 8வது இடத்தில் உள்ளது. ஆஸ்திரேலியா தொடர்ந்து முதலிடத்தில் நீடிக்கிறது. இன்றைய போட்டிகளில் இந்தியாவின் நட்சத்திர ஈட்டி எறிதல் வீரர் நீரஜ் சோப்ரா களமிறங்குகிறார். மேலும் விஷால் (400 மீ.), சமர்தீப் சிங், தஜிந்தர்பால் சிங், நிதி ராணி, சீமா, பாருல் சவுத்ரி, மார்டினா, லவ்பிரீத் சிங் உள்ளிட்ட பலர் பதக்க நம்பிக்கையுடன் போட்டியிட உள்ளனர்.