“வருங்கால தலைமுறையினர் மீது அதிக நம்பிக்கை” – லண்டனில் மோகன் பாகவத்

லண்டனில் நடைபெற்ற கலாசாரம் தொடர்பான கலந்துரையாடல் நிகழ்ச்சியில் ஆர்.எஸ்.எஸ். தலைவர் மோகன் பாகவத் பங்கேற்று பேசினார். அப்போது பன்முகத்தன்மை, ஒற்றுமை, சுற்றுச்சூழல் பாதுகாப்பு மற்றும் எதிர்கால தலைமுறை குறித்து தனது கருத்துகளை அவர் பகிர்ந்து கொண்டார். உலக அளவில் நிலவும் பல்வேறு மோதல்களுக்கு பன்முகத்தன்மையையும் ஒற்றுமையையும் இணைத்துச் செயல்படுவது தீர்வாக அமையும் என்று மோகன் பாகவத் தெரிவித்தார். வருங்கால தலைமுறை மீது நம்பிக்கை வருங்கால சந்ததியினர் மீது தனக்கு அதிக நம்பிக்கை இருப்பதாக கூறிய மோகன் பாகவத், உலகை மேலும் சிறந்த இடமாக மாற்ற வேண்டும் என்ற எண்ணம் அவர்களிடம் இருப்பதாக தெரிவித்தார். இலக்கை மட்டும் நிர்ணயித்துக் கொடுத்தால் போதும் என்றும், அதனை அடைவதற்கான வழியை வருங்கால தலைமுறையினர் தாங்களே கண்டறிந்து கொள்வார்கள் என்றும் அவர் கூறினார். பிரிவினைகளை கடந்து அனைவரும் ஒற்றுமையாக வாழ வேண்டியதன் அவசியத்தையும் அவர் வலியுறுத்தினார். அமைதியை உருவாக்கும் பாரதம் பாரதம் முன்னேற்றம் அடையும் போது அது சர்வாதிகாரிகளை உருவாக்கவோ, போர்களை தொடங்கவோ செய்யாது என்றும், மாறாக அமைதியை உருவாக்கும் சக்தியாக இருக்கும் என்றும் மோகன் பாகவத் தெரிவித்தார். தீவிர வெறுப்பை அடிப்படையாகக் கொண்டதே தங்களது பணி என்று சிலர் கூறுவதை கேட்டிருப்பதாகவும், அந்த கருத்து முற்றிலும் தவறானது என்றும் அவர் குறிப்பிட்டார். ஒரு ஹிந்து என்பவர் தனிப்பட்ட நபராக மட்டும் இல்லாமல், குடும்பம், சமூகம், சமுதாயம் மற்றும் ஒட்டுமொத்த மனிதகுலத்துடன் தொடர்புடையவராக இருப்பதாக அவர் விளக்கினார். இயற்கையை பாதுகாக்க வேண்டும் இயற்கையை நேசிப்பதும் பாதுகாப்பதும் முக்கியம் என்று குறிப்பிட்ட மோகன் பாகவத், வளர்ச்சி என்பது சுற்றுச்சூழல் பாதுகாப்புக்கு எதிரானதாக இருக்கக் கூடாது என்றார். மனிதர்களின் முன்னேற்றம் இயற்கையின் முன்னேற்றத்திற்கும் துணை நிற்க வேண்டும் என்றும், வளர்ச்சியும் சுற்றுச்சூழல் பாதுகாப்பும் ஒன்றுக்கொன்று முரண்பட வேண்டிய அவசியமில்லை என்றும் தெரிவித்தார். “வாழுங்கள்; வாழ விடுங்கள்” போட்டி மற்றும் பகைமை அடிப்படையிலான சிந்தனைகளை விட, அனைவருக்கும் தேவையானவை கிடைக்க வேண்டும் என்ற எண்ணம் உருவாக வேண்டும் என்று மோகன் பாகவத் கூறினார். இயற்கையை வெல்ல வேண்டிய அவசியம் இல்லை என்றும், மனிதர்களும் இயற்கையின் ஒரு பகுதிதான் என்றும் அவர் குறிப்பிட்டார். “வாழுங்கள், வாழ விடுங்கள்; மற்றவர்களையும் வாழ வையுங்கள்” என்ற அணுகுமுறையுடன் சமூகத்தின் சிந்தனைப் போக்குகள் உருவாக வேண்டும் என்றும் அவர் வலியுறுத்தினார். பன்முகத்தன்மை இயற்கையானது என்பதால், அதை ஏற்றுக்கொண்டு மதிப்பதே அனைவரின் பொறுப்பு என்றும் மோகன் பாகவத் தெரிவித்தார்.