கூட்டணி அரசுக்கான முயற்சி: விஜய் தலைமையில் தீவிர பேச்சுவார்த்தை தொடக்கம்

தமிழக சட்டசபை தேர்தலில் 108 இடங்களில் வெற்றி பெற்று, தனிப்பெரும் கட்சியாக உருவெடுத்துள்ள தமிழக வெற்றிக் கழகம் (த.வெ.க.), ஆட்சி அமைக்க தேவையான பெரும்பான்மையை பெற கூட்டணி முயற்சிகளில் இறங்கியுள்ளது. அதற்காக, காங்கிரஸ், விடுதலை சிறுத்தைகள் கட்சி மற்றும் கம்யூனிஸ்ட் கட்சிகளுடன் விஜய் தரப்பு ஆரம்ப கட்ட பேச்சுவார்த்தைகளை தொடங்கியுள்ளது. சென்னையில் நடைபெற்ற த.வெ.க. எம்.எல்.ஏ.க்கள் கூட்டத்தில், கட்சியின் சட்டசபை குழு தலைவராக விஜய் ஒருமனதாக தேர்வு செய்யப்பட்டார். தேர்தல் வெற்றிக்கு பின் முதன்முறையாக கட்சி அலுவலகம் வந்த விஜய்க்கு உற்சாக வரவேற்பு அளிக்கப்பட்டது. வெற்றி பெற்ற எம்.எல்.ஏ.க்களுடன் தனிப்பட்ட சந்திப்பில், ஆதரவு கடிதங்களை பெற்றுக் கொண்டார். இதனைத் தொடர்ந்து, ஆட்சி அமைப்பதற்கான திட்டங்கள் குறித்து ஆலோசிக்கப்பட்டது. விஜய் தனது உரையில், “மக்கள் நம்பிக்கையை நாங்கள் மதிக்கிறோம். பெரும்பான்மை இல்லாத சூழலில் கூட, நம்பிக்கையுடன் முன்னேறுவோம். நம்மோடு இணையும் கட்சிகளுடன் அதிகாரத்தை பகிர தயாராக உள்ளோம்” என தெரிவித்தார். இதற்கிடையில், எம்.எல்.ஏ.க்கள் யாரும் சென்னை நகரத்தை விட்டு வெளியே செல்ல வேண்டாம் என்று கட்சி உத்தரவு பிறப்பித்துள்ளது. மற்றொரு புறம், தி.மு.க. தலைவர் ஸ்டாலின் தனது கூட்டணி கட்சிகளுடன் ஆலோசனை நடத்தி, த.வெ.க.க்கு ஆதரவு வழங்க வேண்டாம் என கேட்டுக் கொண்டதாக தகவல்கள் வெளியாகியுள்ளன. விடுதலை சிறுத்தைகள் தலைவர் திருமாவளவன் மற்றும் கம்யூனிஸ்ட் கட்சித் தலைவர்கள், கூட்டணியில் இணைவது குறித்து மேலிட முடிவு எடுக்கப்படும் என தெரிவித்துள்ளனர். இந்நிலையில், த.வெ.க. நிர்வாகிகள் கவர்னரிடம் ஆட்சி அமைக்க உரிமை கோரி கடிதம் அளித்திருப்பதும் அரசியல் வட்டாரங்களில் பரபரப்பை ஏற்படுத்தியுள்ளது.