மத்திய பிரதேசம்: வந்தே மாதரம் பாட மறுத்த காங்கிரஸ் முஸ்லிம் கவுன்சிலர்கள் – இந்தூரில் சர்ச்சை

மத்திய பிரதேச மாநிலத்தின் இந்தூர் மாநகராட்சியில் நடைபெற்ற பட்ஜெட் கூட்டத்தில் ‘வந்தே மாதரம்’ பாடலைப் பாட மறுத்த காங்கிரஸ் கட்சியைச் சேர்ந்த இரண்டு முஸ்லிம் பெண் கவுன்சிலர்கள் தொடர்பான சம்பவம் பெரும் சர்ச்சையை ஏற்படுத்தியுள்ளது. மோகன் யாதவ் தலைமையிலான பா.ஜ. அரசு செயல்பட்டு வரும் நிலையில், இந்தூர் மாநகராட்சியில் நடந்த கூட்டத்தின் தொடக்கத்தில் ‘வந்தே மாதரம்’ பாடப்பட்டது. அப்போது, காங்கிரஸ் கவுன்சிலர்களான பவுஜியா ஷேக் அலீம் மற்றும் ருபினா இக்பால் ஆகியோர் பாடலில் பங்கேற்க மறுத்தனர். இதற்கு எதிர்ப்பு தெரிவித்த பா.ஜ. கவுன்சிலர்கள், இது தேசிய உணர்வுக்கு எதிரான செயல் எனக் கூறி முழக்கமிட்டனர். இதனால் கூட்டத்தில் பெரும் குழப்பம் நிலவியது. பின்னர், மாநகராட்சி தலைவர் இரு கவுன்சிலர்களையும் கூட்டத்திலிருந்து வெளியேறுமாறு கேட்டுக்கொண்டார். அதன்படி அவர்கள் கூட்டத்திலிருந்து வெளியேறினர். இதுகுறித்து செய்தியாளர்களிடம் பேசிய ருபினா இக்பால், “எங்கள் இஸ்லாமிய நம்பிக்கையின் படி, அல்லாவைத் தவிர வேறு யாரையும் வழிபட முடியாது. ‘வந்தே மாதரம்’ பாடலில் உள்ள பொருள் எங்கள் மத நம்பிக்கைக்கு முரணானது,” என்றார். மேலும், “நாங்கள் தேசிய கீதத்தை மதிக்கிறோம். ஆனால் ‘வந்தே மாதரம்’ பாடலை பாட கட்டாயப்படுத்த முடியாது,” எனவும் தெரிவித்தார். இந்நிலையில், காங்கிரஸ் கட்சியின் செய்தித் தொடர்பாளர் கே.கே.மிஸ்ரா, இந்த சம்பவம் அரசியல் நாடகமாக இருக்கலாம் என்றும் கடுமையாக விமர்சித்துள்ளார்.